Միս վաճառողը պետք է տվյալ արտադրանքի որակը հաստատող փաստաթուղթ ունենա, որը պետք է ստորագրված լինի անասնաբույժի կողմից։ Այս մասին օգոստոսի 11-ին լրագրողների հետ հանդիպման ժամանակ հայտարարեց Հայաստանի սպառողների միության նախագահ Արմեն Պողոսյանը։
Նրա խոսքով՝ այդ փաստաթուղթը պետք է փակցվի աչքի ընկնող տեղում։ «Մեր խնդիրն է՝ պաշտպանել մեր երեխաներին։ Միս գնելուց առաջ պետք է հետաքրքրվել, թե որտեղ է անասնաբույժի եզրակացությունը։ Այն պետք է աչքի ընկնող տեղում լինի։ Եթե այն չհրկիզվող պահարանում է, նշանակում է՝ դրան այլեւս չի կարելի վստահել»,- ասաց Պողոսյանը։
Բացի այդ, ըստ նրա, այդ թուղթը գործում է 24 ժամվա ընթացքում եւ տվյալ ժամանակի սպառվելուն պես վաճառողը պետք է նոր եզրակացություն ստանա։
