«Խոսրովի անտառ» արգելոցում սարսափելի հրդեհը վկայում է ԱԻՆ-ի տեխնիկական սարքավորվածության մեծ բացթողումների մասին։ Նման տեսակետ է հայտնել բնապահպան, Հայաստանի նախկին բնապահպանության նախարար Կարինե Դանիելյանը ՝NEWS.am -ի խնդրանքով մեկնաբանելով արգելոցում բռնկված հրդեհի շուրջ իրավիճակը ։

Բնապահպանը հիշեցրել է, որ ճանապարհների ցանցի բացակայության դեպքում հրդեհն առանց ավիացիայի օգնության մարելը ծայրաստիճան խնդրահարույց է։ «Սակայն ակնհայտ է, որ բավարար քանակության տեխնիկա չկա։ Դա շատ մեծ բացթողում է։ Մենք անընդհատ խոսում ենք կլիմայի փոփոխության, տաքացման մասին, բայց չկա լուրջ մոտեցում աղետների կանխմանը»,- նկատեց բնապահպանը։ Նրա խոսքով՝ Հայաստանի անտառներում նախկինում էլ են եղել խոշոր հրդեհներ, բայց նման Խոսրովի անտառում բռնկված հրդեհն իր ծավալներով աննախադեպ է ։ «Սա շատ ողբերգական պատահար է»,- նկատեց Կարինե Դանիելյանը։

«Խոսրովի անտառում» բնակվում են սողունների 30 տեսակներ, 50 տեսակի կաթնասուններ, 130 տեսակի թռչուններ։