Զանգվածային անկարգություններին մասնակցելու համար 3,5 տարվա ազատազրկման դատապարտված Արարատ Խանդոյանի գործով վերաքննիչ բողոքի առաջին նիստը հետաձգվեց:
ՀՀ Վերաքննիչ քրեական դատարան Խանդոյանի պաշտպան Արա Ղարագյոզյանը գրություն էր ուղարկել, որ գտնվում է ամենամյա արձակուրդի մեջ եւ խնդրել նիսռտը հետաձգել մեկ այլ հերթի: Հաշվի առնելով գրությունը՝ դատարան չէր բերվել Արարատ Խանդոյանը: Նշենք, որ ամբաստանյալի պաշտպանը պահանջում է արդարացում:
Ըստ մեղադրական եզրակացության՝ Արարատ Խանդոյանը 2016թ. հուլիսի 20-ին Երեւանում տեղի ունեցած հասարակական անվտանգությունը վտանգած բռնությամբ, ջարդելով, գույք ոչնչացնելով եւ վնասելով արտահայտված զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ձեռքերով եւ ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը:
