Աշխարհում դեռ նոր են սկսում արտադրել մարտական ռոբոտներ, բայց բազմաթիվ ընկերությունների ներկայացուցիչներ արդեն բաց նամակ են գրել՝ կոչ անելով արգելել մարդասպան ռոբոտների արտադրությունը։ Նամակի տակ ստորագրել են  նաեւ Իլոն Մասկը, DeepMind լաբորատորիայի ղեկավարն ու շատ ուրիշներ։ Այն բանից հետո, երբ դիմումը հավաքել է հարյուրից ավելի ստորագրություն, այն ուղարկել են ՄԱԿ, հայտնումէ Hi-Tech News-ը։

Ինքնագնա տանկերն ու արհեստական ինտելեկտով սարքավորված սպառազինման մյուս տեսակներն  ապագայում կարող են վտանգ ներկայացնել, դրա համար էլ նամակի հեղինակները վախենում են հերթական ռազմական հեղափոխության սկզբից ու սպառազինումների մրցավազքից, որի ընթացքում Երկրի վրա կարող են հայտնվել նոր մահաբեր սարքավորումներ, որոնք վտանգ են ներկայացնում մարդկության համար։

Նամակի բովանդակությունն այն է, որ զենքի որոշակի տեսակների արգելման ու սահմանափակման մասին հռչակագիրը, որը 1983-ին է ընդունվել,  անհրաժեշտ է բարելավել, դրանում ընդգրկելով նաեւ մարտական ռոբոտներին ու մյուս ինքնակառավարվող զինատեսակները։