Արագածոտնի մարզի Ապարան քաղաքում այսօր՝ օգոստոսի 22-ին, հողին են հանձնել Մեղրիի զորամասերից մեկում օգոստոսի 20-ին իր աշխատասենյակում մահացած հայտնաբերված 26-ամյա կապիտան Անդրանիկ Մկրտչյանին: Այս մասին NEWS.am-ին հայտնեցին Ապարանի քաղաքապետարանից՝ նշելով, որ զինծառայողի հուղարկավորությանը մասնակցել են բարձրաստիճան զինվորականներ եւ նրա ծառայակիցները:
Անդրանիկ Մկրտչյանի աշխատասենյակում հայտնաբերել են գրություն, որում գրված է իր մահվան մեջ ոչ ոքի չմեղադրել: Զինծառայողին հայտնաբերել էին ծնոտի շրջանում ստացած հրազենային վնասվածքով, ըստ ՔԿ հաղորդագրության, նա վնասվածքը ստացել է իրեն ամրակցված զենքից: Հարուցվել է քրեական գործ՝ ինքնասպանության հասցնելու հոդվածով:
Անդրանիկ Մկրտչյանը ՀՀ ՊՆ Վազգեն Սարգսյանի անվան ռազմական ինստիտուտն ավարտելուց հետո ծառայության էր անցել ՀՀ զինված ուժերում, ունի կապիտանի կոչում: Անդրանիկ Մկրտչյանն ընտանիքի փոքր տղան է, ունի իրենից մեծ եղբայր, որը նույնպես ծառայում է ՀՀ զինված ուժերում:
Դեպքի հանգամանքները պարզելու համար կատարվում է քննություն:
