«Սասնա ծռերի» գործով նիստի ժամանակ, այսօր՝ օգոստոսի 23-ին, դատավոր Արտուշ Գաբրիելյանը վերադառնալով խորհրդակցական սենյակից մերժեց Կարո Եղնուկյանի շահերի պաշտպան Տիգրան Հայրապետյանի՝ իրեն հայտնած ինքնաբացարկի միջնորդությունը, որից հետո նիստերի դահլիճ հրավիրեց ամբաստանյալներ Պապիկ Մանուկյանին, Արայիկ Խանդոյանին եւ Արեգ Կյուրեղյանին:
Նշենք, որ նրանք նիստերի դահլիճից հեռացվել էին 8-10 ժամով եւ նիստերի դահլիճ բերվեցին ինքնությունները ճշտելու համար:
Երբ Արտուշ Գաբրիելյանը ամբաստանյալ Պավլիկ Մանուկյանից ճշտում էր նրա ինքնությունը, վերջինս հետաքրքրվեց, թե արդյոք լրացել է իր սանկցիայի ժամկետը, որին դատավորը բացասական պատասխան տվեց: «Բա ինչի՞ եք կանչես էստեղ, եթե չի լրացել»,-ասաց նա: Դատարանը նրանից հետաքրքրվեց, թե արդյոք ցանկանո՞ւմ է, որ իր շահերը պաշտպանեն իր պաշտպաններ, ինչին Պավլիկ Մանուկյանը պատասխանեց. «Հայաստանի բոլոր քաղբանտարկյալները երազում են իմ պաշտպանների նման պաշտպաններ ունենալ»:
Այնուհետեւ դատարանը փորձեց Արայիկ Խանդոյանից ճշտել նրա ինքնությունը. վերջինս դատարանին դիմեց հետեւյալ բառերով. «Ընկեր Միկոյան, հարց եք տվել, լսեք պատասխանը»: Արտուշ Գաբրիելյանը Արայիկ Խանդոյանից հետաքրքրվեց. «Դուք պաշտպան ունե՞ք», ինչին վերջինս արձագանքեց. «Ամբողջ ազգն է իմ պաշտպանը»։ Հետո ավելացրեց. «Ինձ պաշտպան պետք չէ, ինձ հարձակվող է պետք»։
Ամբաստանյալների ինքնությունը ճշտելուց հետո դատարանը հայտարարեց, որ Արեգ Կյուրեղյանի պաշտպան Մուշեղ Շուշանյանը չի ներկայանում դատական նիստերին եւ որոշում է կայացվել նրա համար հանրային պաշտպան ներգրավել: Սակայն նշենք, որ Արեգ Կյուրեղյանը հայտարարել էր, որ ցանկանում է, որ իր շահերի պաշտպանությունը շարունակի Մուշեղ Շուշանյանը եւ չի ցանկանում ունենալ այլ պաշտպան:
Ամբաստանյալներից Սեդրակ Նազարյանի եւ Էդվարդ Գրիգորյանի շահերի պաշտպան Լուսինե Սահակյանն էլ հայտարարեց, որ իր եւ իր պաշտպանյալների կողքին նստած ոստիկանը հեռախոսով նկարահանում է, թե ինչ են անում իրենք: «Հարգելի դատարան, ոստիկանը նկարահանում է կատարում, թե ինչ ենք անում մեր սարքավորումներով ես եւ իմ պաշտպանյալները: Պահանջում եմ այս հարցին լուծում տալ, որովհետեւ նա փաստաբանական գաղտնիք է նկարահանել եւ պետք է ջնջի այն»,- դիմեց նա դատավորին, որից հետո ամբաստանյալներից Աշոտ Պետրոսյանը դիմեց դատարանին. «Ձերդ ազնվություն, Ձերդ արդարադատություն, դե լուծում տվեք էս հարցին»:
Նշենք, որ այսօր նաեւ լրացավ ամբաստանյալ Գագիկ Եղիազարյանի նկատմամբ կիրառված սանկցիայի ժամկետը, եւ նա բերվեց նիստերի դահլիճ:
