Գիտնականները հայտնաբերել են հնագույն դելֆինների նախկինում անհայտ տեսակ, որը գոյություն է ունեցել մոտ 30 մլն տարի առաջ: Դրանք փոքր եւ անատամ կենդանիներ էին, կարծում են գիտնականները: Այս մասին հայտնում է Proceedings of the Royal Society B-ն:
Դելֆինի գանգը հայտնաբերվել է ԱՄՆ-ի Հարավային Կարոլինա նահանգում՝ գետի հատակին: Այն վերակառուցելով՝ գիտնականները պարզել են, որ հնագույն դելֆինները մոտ մեկ մետր երկարություն են ունեցել՝ կարճ, անատամ դնչով: Այդուհանդերձ, նրանք էխոլոկացիա են ունեցել, որը հատուկ է ատամնավոր կետերի ենթակարգին: Նոր տեսակը ստացոել է Inermorostrum xenops անվանումը:
Դելֆինն, ըստ երեւույթին, մանր ձկներով, ութոտնուկներով եւ փափուկ մարմին ունեցող այլ կենդանիներով է սնվել: Քանի որ նրա դունչը ցած է թեքված, գիտնականները ենթադրում են, որ նա սնունդ է որոնել օվկիանոսի հատակին: Հետաքրքիր է, որ I.xenops-ի հնագույն նախահայրերն, այնուամենայնիվ, ատամներ ունեցել են, սակայն 4 մլն տարվա ընթացքում դրանք վերացել են: