«Ընդդեմ իրավական կամայականութան» ՀԿ փաստաբան, Արայիկ եւ Արարատ Խանդոյանների պաշտպան Արա Ղարագյոզյանը դիմել է ՀՀ մարդու իրավունքների պաշտպանին՝ խնդրելով միջոցներ ձեռնարկել իր պաշտպանյալների խախտված իրավունքները վերականգնելու համար: NEWS.am-ի հետ զրուցում այսօր՝ սեպտեմբերի 5-ին, Արա Ղարագյոզյանը նշեց, որ դատարանի որոշմամբ Խանդոյանների նկատմամբ վերացվել է մերձավոր ազգականների հետ տեսակցելու արգելքը, սակայն «Նուբարաշեն» ՔԿՀ-ի պետը մերժել է Արայիկ Խանդոյանի հետ կարճատեւ տեսակցություն տրամադրելու մասին Արարատ Խանդոյանի դիմումը:
«Կալանավորված անձն իրավունք ունի տեսակցելու իր մերձավոր ազգականի հետ, իսկ եղբայրը մերձավոր ազգական է, ուստի Արայիկ Խանդոյանն ու Արարատ Խանդոյանն իրավունք ունեն տեսակցել միմյանց ձերբակալված եւ կալանավորված անձանց մասին ՀՀ օրենքի 15-րդ հոդվածի իրավունքի ուժով եւ այն պնդումը, թե Արայիկ եւ Արարատ Խանդոյանները կալանավորված են եւ չեն կարող միմյանց տեսակցել հակասում է ՀՀ Սահամանդրության 42-րդ հոդվածի պահանջներին, համաձայն որի՝ յուրաքանչյուր ոք ազատ է կատարելու այն, ինչն արգելված չէ օրենքով»,-ասաց նա:
