Այսօր Արեւի վրա տեղի է ունեցել վերջին 12 տարիների ամենահզոր բռնկումը, որն առաջացել էր արեւային բծերի երկու խոշորագույն խմբերի միաձուլման հետեւանքով, հայտնում է Լեբեդեւի անվան Ֆիզիկայի ինստիտուտի Արեւի ռենտգենային աստղագիտության լաբորատորիան։
«Նման հզորության իրադարձությունները, որպես կանոն, տեղի են ունենում արեւային ակտիվության գագաթնակետի փուլում։ Թե ինչպես է ստացվել, որ նման մակարդակի բռնկումը հիմա է տեղի ունեցել՝ արեւային նվազագույնի պայմաններում, դեռ պարզել է պետք»,- հայտնում են աստղագետները։
Ըստ ռենտգենային ճառագայթման հզորության՝ արեւային բռնկումները բաժանվում են հինգ կարգի՝ A, B, C, M եւ X։ A0.0 նվազագույն կարգը համապատասխանում է Երկրի ուղեծրի վրա քառակուսի մետրին 10 նանովատ ճառագայթման հզորությանը։ Հաջորդ տառին անցնելիս՝ հզորությունը ավելանում է 10 անգամ։
Այսօրվա բռնկումը պատկանում է վերջին՝ Х կարգին եւ գնահատվում է որպես Արեւի մակերեսին տեղի ունեցած ու գիտությանը հայտնի հինգ ամենահզոր պայթյուններից մեկը։ Գիտնականների խոսքով՝ այն տեղի է ունեցել այն կետում, որը Երկրին է «նայում» ու այդ պատճառով էլ դրա ազդեցությունը մեր մոլորակի վրա առավելագույն կլինի։ Երկրի վրա կյանքի, նաեւ ուղեծրում գտնվող տիեզերագնացների ու արբանյակների համար դրա հետեւանքները դեռ անհնար է կանխատեսել, այդ մասին հայտնի կդառնա միայն մի քանի օր անց։
Լաբորատորիայի մասնագետները նշում են, որ պայթյունային ակտիվության ընթացիկ մակարդակը դուրս է եկել տասը բալանոց սանդղակի սահմաններից՝ հասնելով 10․3 նիշին ու հիմա գտնվում է այսպես կոչված «սեւ» ոլորտում։