Ռուսաստանի, Հայաստանի եւ Ադրբեջանի հոգեւոր առաջնորդների հանդիպումն իր ավանդը կունենա Լեռնային Ղարաբաղի շուրջ խաղաղարարական գործընթացում։ «ՌԻԱ Նովոստի»-ի փոխանցմամբ՝ այս մասին Համայն հայոց կաթողիկոս Գարեգին II-ի եւ Կովկասի մուսուլմանների վարչության նախագահ շեյխ-ուլ-իսլամ Ալլահշուքյուր Փաշա Զադեի հետ հանդիպման ժամանակ հայտարարել է Մոսկվայի եւ Համայն Ռուսիո Կիրիլ պատրիարքը։
«Այսօր մենք կշարունակենք մեր համատեղ մտորումները՝ Լեռնային Ղարաբաղի իրավիճակի եւ Լեռնային Ղարաբաղի շուրջ ծավալված իրադրության մասին։ Ակնհայտ է, որ գոյություն ունեցող խնդիրներն անբավարար վիճակում են եւ դրա հետ մեկտեղ՝ Հայաստանի եւ Ադրբեջանի ժողովուրդները առաջ գնալու ցանկություն ունեն, որպեսզի աշխարհն ավելի ամուր ու արդար լինի»,-հանդիպման ժամանակ ասել է Կիրիլ պատրիարքը։
Կիրիլ պատրիարքը հայտարարել է, որ «այսօրվա հանդիպումից մեծ ակնկալիքներ ունի» եւ հավատում է, որ «խաղաղություն հաստատելու գործընթացում այն իր ավանդը կունենա»։
«Կրոնը մեր ժողովուրդների համար կարող է միավորող դեր խաղալ եւ կխաղա»,-հույս է հայտնել պատրիարքը։
Նրա խոսքով՝ հոգեւոր առաջնորդները՝ «որպես հավատացյալ մարդիկ», խոսում են «աշխարհիկ գործիչների լեզվից տարբերվող լեզվով», ինչը նրանց օգնում է հաղթահարել տարաձայնությունները։