Կիեւի Դնեպրովյան դատարանը հետաձգել է Օդեսայի նախկին նահանգապետ Միխայիլ Սաակաշվիլիի դեմ ՆԳ նախարար Արսեն Ավակովի հայցի քննումը։ Ավակովը Սաակաշվիլիին դատի է տվել իր արժանապատվությունը վիրավորելու համար։
Համապատասխան որոշումն ընդունվել է սեպտեմբերի 18–ին, հայտնում է «Գրոմադսկոե»–ն։ Գործի քննությունը հետաձգվել է, քանի որ պատասխանող կողմերից մեկը՝ լրագրող Տատյանա Դանիլենկոն, չի ներկայացել դատարան։ Փաստաբանները պնդում են, որ Դանիլենկոն դատարան ներկայանալու ծանուցում չի ստացել։
«Քանի որ ծանուցում չստանալու պատճառներն անհայտ են, դատարանը մինչեւ նոյեմբերի 21-ը ընդմիջում է հայտարարել։ Դատական նիստը հայտարարվում է փակված»,– ասել է դատավոր Նատալյա Արապինան։
Ավակովը պահանջում է հերքել Սաակաշվիլիի այն հայտարարությունը, թե ինքն իբրեւ թե երկքաղաքացիություն ունի։
