Քաղաքական կամքի առկայության դեպքում հնարավոր է կարգավորել Հայաստանի եւ ԱՄՆ-ի միջեւ կրկնակի հարկման բացառման մասին պայմանագրի ստորագրման հետ կապված հարցերը: Սեպտեմբերի 19-ին լրագրողների հետ զրույցում այս մասին ասաց ԱՄՆ-ում Հայաստանի արտակարգ եւ լիազոր դեսպան Գրիգոր Հովհաննիսյանը, որը Երեւան է ժամանել ԱՄՆ Կոնգրեսի Ներկայացուցիչների պալատի անդամների հետ:
Դեսպանը լավատեսորեն է տրամադրված նշված պայմանագրի կնքման հարցում: Նրա խոսքով՝ գործընթացը սովորաբար երկար է տեւում, սակայն անհրաժշտության եւ քաղաքական կամքի առկայության դեպքում ամեն ինչ հնարավոր է կարգավորել: «Այս պայմանագիրը Հայաստանի կառավարության օրակարգում է, այսօր մենք այն քննարկել ենք: Խորհրդարանականները գիտեն, որ սա երկարատեւ գործընթաց է, եւ մենք պայմանավորվեցինք, որ կշարունաենք կառավարության հետ աշխատել, որպեսզի այն արագացնենք: Պետք է նշեմ, որ սովորաբար այն երկրները, որոնց հաջողվում է այս պայմանագիրը ստորագրել, գործընթացով 1-3 տարի են անցնում: Կարծում եմ՝ եթե անհրաժեշտություն եւ քաղաքական կամք կա, մնացյալն արդեն տեխնիկական հարցեր են, որոնց լուծումը ես եւ իմ ամերիկացի գործընկերները փորձում ենք արագացնել»,- նշեց Հովհաննիսյանը:
