ԵՄ-ում մուսուլման միգրանտների մեծամասնությունը զգում է անքակտելի կապ եվրոպական համայնքի հետ, հավատում է դրա ժողովրդավարական կառույցներին ու Եվրոպան համարում իր նոր տունը, չնայած ռասսայական նշանով խտրականության առկայությանը։ Այս մասին ասվում է ԵՄ հիմնական իրավունքների հարցերով գործակալության զեկույցում, փոխանցում է ՏԱՍՍ-ը։

Հետազոտությունն իրականացվել է 2016-ին ու ընդգրկել ավելի քան 10 հազար մուսուլման միգրանտների ու նրանց երեխաների կարծիքը, որոնք ավելի քան մեկ տարի մշտապես ապրում են ու աշխատում ԵՄ տարածքում  ու հաշվի չի առնում միգրացիոն ճգնաժամի ալիքի ժամանակ ժամանածներին։ Հետազոտությունը մանրակրկիտ ուսումնասիրել է ԵՄ-ին մուսուլմանների պատկանելիության զգացումը, վերաբերմունքը խտրականության խնդրին ու նրանց կողմից իրենց հիմնական իրավունքների իմացությունը։ Մասնագետները խնդրել են հինգ բալանոց սանդղակով գնահատել իրենց կենսապայմանները ու պատկանելիությունը Եվրոպային։

Եվ այսպես, հարցման մասնակիցների մեծ մասը 4-ից 5 բալ են գնահատել ԵՄ-ին իրենց պատկանելիությունը ու այն կազմել է 4․1 բալ։ Արդյունքում մուսուլմանների 76 տոկոսը համարում է, որ սերտ կապված է ԵՄ-ում իր բնակության երկրի հետ։ Վատագույն արդյունքները դրսեւորվել են Ավստրիայում, Նիդերլանդներում ու Իտալիայում՝ այդ երկրներում միջին գնահատականը կազմել է 3․5 միավոր։