ԱԱԾ-ի կողմից վնասազերծված զինված խմբի գործով Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր` սեպտեմբերի 22-ին, ցուցմունք տվեց գործով վկա Իլիչ Թադեւոսյանը: Ամբաստանյալներից Արթուր Վարդանյանը բարկացավ, երբ նա իր ցուցմունքով նշեց, որ իր հորն Արթուրը ցանկացել է Քեսաբ տանել եւ, երբ նա զանգել է հորը, ինքը վերցրել է հեռախոսը եւ զգուշացրել այլեւս չանհանգստացնել իր հորը: Արթուր Վարդանյանը վկային հորդորեց սուտ ցուցմունք չտալ՝ զգուշացնելով, որ այլապես քրեական պատասխանատվության կենթարկվի:
«Գիտես չէ, որ կեղծ ցուցմունք տալը լավ բան չի: Քանի՞ անգամ ինձ զանգեցիր դու, ինչ սուտ, իրար հակասող ցուցմունք ես տալիս»,-վկային հարցրեց Արթուր Վարդանյանը: Որին ի պատասխան վկան ասաց. «Մեկ անգամ եմ զանգել, երբ հորս հետ խոսում էիր, հայրս էլ ասաց՝ ես Քեսաբ կգամ, դոշ կտամ, թող ինձ խփեն, բայց քեզ չխփեն: Էդ պահին հեռախոսը վերցրի, ասացի, որ էլ չզանգես, դու էլ ասիր՝ «Լակոտ, ես բանուգործ չունե՞մ, քո հետեւից ընկնեմ, ես հազար հատ գործ ունեմ...»:
Վկան նշեց, որ ավելի ուշ՝ 2015թ. հոկտեմբերի 3-ին, զանգել են իր հորը, կանչել Սպիտակ. հայրը գնացել է այնտեղ եւ հանձնել իր հրացանը:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
