Քրդերն այս տարվա սեպտեմբերի 25-ին պատրաստվում են հանրաքվե անցկացնել եւ նրանք ունեն այդ իրավունքը։ Այս մասին սեպտեմբերի 22-ին՝ լրագրողների հետ հանդիպման ժամանակ, հայտարարել է Թուրքիայի խորհրդարանի Ժողովուրդների դեմոկրատական կուսակցության պատգամավոր Կարո Փայլանը։
Հարցին՝ արդյոք հիմնավորված են մտահոգությունները, որ Իրաքյան Քուրդիստանի անկախության հանրաքվեից հետո Թուրքիայի քրդերը հայկական տարածքներում կհռչակեն իրենց պետությունը, պատգամավորը նշել է. «Քրդերն ասում են, որ Արեւմտյան Հայաստանը քրդական երկիր է: Մենք ասում ենք՝ դա մեր պատմական երկիրն է, իսկ թուրքերն ասում են` դա իրենց հողն է: Եթե յուրաքանչյուրը պնդի իր կարծիքը, վեճ կառաջանա: Մենք պետք է ելք գտնենք այս իրավիճակից», - ասել է Փայլլանը: Քրդերն, ըստ պատգամավորի, պնդում են, որ անկախություն են ուզում։
«Պետք է հաշվի անել՝ ինչ պետություն է Քուրդիստանը։ Այնտեղ կան ասորիներ, հույներ, հայեր եզդիներ, այլ ազգեր եւ կրոնական փոքրամասնություններ։ Եթե Քուրդիստանի Սահմանադրությունը ժողովրդավար չլինի, ես չեմ ուզում այդպիսի Քուրդիստան։ Մենք պետք է հասկանանք, որ իրականում սահմանները կարեւորություն չունեն, քանի որ չենք կարող գծել՝ այստեղ Քուրդիստան է, այստեղ՝ Թուրքիան, իսկ այստեղ՝ Հայաստանը։ Պետք է այնպես անել, որ բոլորը հավասար ապրեն»,- ասել է Փայլանը։