Վերաքննիչ քրեական դատարանն անփոփոխ է թողել պետական դավաճանության մեջ մեղադրվող, հետախուզության պետ, մայոր Գարիկ Մարությանի դատավճիռը:
Արմավիրի մարզի ընդհանուր իրավասության դատարանը, դռնփակ քննելով գործը, Մարությանին մեղավոր էր ճանաչել Քրեական օրենսգրքի 299-րդ հոդվածի 1-ին մասով եւ դատապարտել 14 տարվա ազատազրկման: Վերաքննիչն օրերս անփոփոխ է թողել վճիռը:
Պաշտպանական կողմը դեռեւս որոշում չունի՝ բողոքարկելու է Վերաքննիչի վճիռը, թե ոչ: Նշենք, որ Մարությանն իրեն առաջադրված մեղադրանքը չի ընդունում:
Ըստ մեղադրական եզրակացության՝ Գարիկ Մարությանն 1997-2014թթ. զբաղեցրել է ՀՀ ՊՆ տարբեր զորամասերի հետախուզության պետի պաշտոնը: Ծառայությունն ավարտելուց հետո 2015թ. հուլիսին նա «Օդնոկլասսնիկի» սոցիալական կայքով ծանոթացել է «Vazgen Kirakosyan» օգտատիրոջ տվյալներով հանդես եկող օգտատիրոջ հետ եւ ընկել Թուրքիայում գործունեություն ծավալած Ադրբեջանի հետախուզական ծառայությունների տեսադաշտը: Նա ադրբեջանական կողմին հաղորդագրություններով փոխանցել է իրեն հասանելի տեղեկություններ, որոնք կարող են օգտագործվել Հայաստանի Հանրապետությունն ու Զինված ուժերը վարկաբեկելու նպատակով: Այս ամենի դիմաց Գարիկ Մ.-ն ստացել է 700 ԱՄՆ դոլար եւ հեծանիվ:
Մարությանը կալանավորված է: