Ապագա խորհրդարանում կհայտնվեն հին ուժերը եւ մեկ-երկու նոր ուժ: Դեկտեմբերի 10-ին հրավիրված ասուլիսում նման հայտարարություն արեց ԱԺ «Ժառանգություն» խմբակցության անդամ, նույնանուն կուսակցության հիմնադիր Րաֆֆի Հովհաննիսյանը: Հարցին, թե ում նկատի ունի հին ու նոր ուժեր ասելով, նա պատասխանեց. «Գիտեմ, որ Հայաստանում մոդա չէ «չգիտեմ» ասելը, բայց ասում եմ՝ չգիտեմ»:
Րաֆֆի Հովհաննիսյանն, այնուամենայնիվ նկատեց, որ եթե ընդդիմությունն ու հասարակությունը ուզում են առաջիկա ընտրությունների ժամանակ հաջողության հասնել, պետք է «Ժառանգություն», Հայ Ազգային կոնգրես, Դաշնակցություն եռյակը եզրեր գտնի: «Եթե ոչ՝ քաղաքական բեկումնային արդյունք մենք չենք տեսնելու»,-նկատեց Հովհաննիսյանը:
Նա նշեց, որ հաջորդ տարի գործընթացներն ավելի ակտիվորեն կմտնեն նախընտրական տրամաբանության մեջ: «Կարծում եմ հաջորդ տարվանից դուք կտեսնեք բյուրեղացում, եւ քաղաքական ուժերը հաջորդ տարվանից շատ ավելի սառը դատողությամբ կկատարեն ինքնագնահատական եւ հաջողության հասնելու հնարավորություն կստեղծեն»,-ասաց նա: Րաֆֆի Հովհաննիսյանը միաժամանակ հավելեց, որ «Ժառանգությունը» կանցնի հաջորդ խորհրդարան եւ կունենա «առաջամարտիկի աշխույժ եւ ակտիվ ներկայություն»: