Գյումրիում մեկնարկել է քաղաքի առաջին թատրոնի (ժողովրդական տուն)` նոր Թումո Գյումրիի կառուցման աշխատանքները: Լրագրողների հետ զրույցում «Թումո» ստեղծարար տեխնոլոգիաների կենտրոնի գործադիր տնօրեն Մարի Լու Փափազյանը նշեց, որ շինարարական աշխատանքները մեկնարկել են 2017թ. հունիսի 10-ին եւ շենքի վերակառուցման աշխատանքները նախատեսվում է ավարտել 2019թ., որից հետո այստեղ կտեղափոխվի Թումո Գյումրի կենտրոնը եւ հնարավոր կլինի Թումոյի կրթական ծրագիրը հասանելի դարձնել շուրջ 4 հազար պատանիների համար:
«60-70-ականների շենք է, շատ հին է: Այսօր փորձում ենք ամեն ինչ անել, որպեսզի հիմքերն ամրացնենք եւ կարողանանք հիմնանորորգել: Այս շենքը որպես թատրոն եւ մշակութային կենտրոն է եղել, այսօր էլ ուզում ենք ստեղծել ալտերնատիվ` կլինի եւ Թումոյի կենտրոնը` 4000 աշակերտով, եւ ալտերնատիվ թատրոն ` հանգստյան օրերին եւ արձակուրդին: Այսինքն` թատրոնի ոգին շարունակելու ենք Թումոյի հետ միասին»,-ասաց նա:
Գյումրիի թատրոնի հին սպիտակ շենքը, որը նախկինում հայտնի էր որպես «Ժողովրդական տուն» գտնվում է Գյումրու կենտրոնական այգու սկզբնամասում: Այս 150 տարվա պատմություն ունեցող շենքը կառուցվել է Ալեքսանդրապոլցիների ներդրումներով: Ժամանակի ընթացքում այն ծառայել է որպես ժողովրդական տուն եւ եղել է համերգների, գրական երեկոների, բաց քննարկումների, պոեզիայի ժամի , թատերական ներկայացումների եւ այլ միջոցառումների անցկացման հիմնական վայր:
