Կուտակային կենսաթոշակային համակարգին մասնակցողների թիվն անցնում է 180 հազարից, որոնց մեծ մասը ոչ պետական հատվածի ներկայացուցիչներն են: Այս մասին, այսօր՝ հոկտեմբերի 2-ին, լրագրողների հետ հանդիպման ժամանակ նշել է ՀՀ աշխատանքի և սոցիալական հարցերի նախարար Արտեմ Ասատրյանը:
Նրա խոսքով, ակտիվները կառավարող ընկերությունների կողմից ներկա դրությամբ կառավարվում է մոտ 80 մլրդ դրամ. «Այս ընթացքում անհատների միջոցներն ավելացել են 32 տոկոսով, ինչը բավականին լավ արդյունք է»,- ասաց Արտեմ Ասատրյանը՝ հավելելով, որ համակարգն, ըստ էության, կայացել է:
Նախարարը նշեց, որ քաղաքացիներին ժամանակ տրվեց՝ զգալու, թե որքանով է այդ համակարգը լուծելու իրենց վաղվա կենսաթոշակի հարցը. «Կենսաթոշակի մասին մտածելը քաղաքացիներին հատուկ չէ: Նրանք ավելի կարճ ժամանակահատվածի համար են մտահոգված, և աշխարհի ցանկացած երկրում սա բարդացնում է թոշակի ռեֆորմերը»:
Արտեմ Ասատրյանը վստահեցրեց, որ օրենսդրական փոփոխությունները հստակ երաշխիքներ են տալիս, որ հետագայում այդ գումարը կվերադառնա թոշակառուին: