Իրանի հետ առեւտրաշրջանառությունը դեռ չի բավարարում եւ այն առնվազն կրկնապատկելու ներուժ կա: Այս մասին, այսօր՝ հոկտեմբերի 10-ին, Թեհրանում Իրանի արդյունաբերության, հանքերի եւ առեւտրի նախարար Մուհամադ Շարիաթմադարիի հետ հանդիպման ժամանակ նշել է ՀՀ տնտեսական զարգացման եւ ներդրումների նախարար Սուրեն Կարայանը:
Նախարարությունից NEWS.am-ին հայտնում են, որ Սուրեն Կարայանը հանդիպման ընթացքում նշել է, որ Իրանի հետ առեւտրաշրջանառությունը դեռ չի բավարարում եւ այն առնվազն կրկնապատկելու ներուժ կա։ Մուհամադ Շարիաթմադարին, համաձայնելով գործընկերոջ հետ, հավելել է, որ նախարարության հետ իրականացվող քայլերը հենց դրան են ուղղվելու։
Կողմերը զրույցի ընթացքում անդրադարձել են ԵՏՄ-Իրան ազատ առեւտրի ժամանակավոր համաձայնագրի ընթացքին։ Նախարար Մուհամադ Շարիաթմադարին շնորհակալություն է հայտնել հայկական կողմին գործընթացին աջակցություն ցուցաբերելու համար։ Հայկական կողմը պատրաստակամություն է հայտնել հետագայում եւս աջակցել գործընթացին՝ հույս հայտնելով, որ կողմերը կարճ ժամկետում ձեռք կբերեն վերջնական պայմանավորվածություններ։
Սուրեն Կարայանը եւ Մուհամադ Շարիաթմադարին քննարկել են համատեղ արտահանող-ներմուծող ընկերությունների գործակցության հեռանկարները։ Հստակեցվել են այս մասով պատասխանատուները, այն է` հայկական կողմից՝ ՀՀ տնտեսական զարգացման եւ ներդրումների նախարարի տեղակալ Հովհաննես Ազիզյանը, իրանական կողմից՝ արդյունաբերության, հանքերի եւ առեւտրի նախարարի տեղակալ Մոջթաբա Խոսրով Թաջը։
Կողմերը պայմանավորվածություն են ձեռք բերել առ այն, որ առաջիկայում կխմբավորվեն երկկողմ ապրանքները՝ անհրաժեշտ աջակցություն ցուցաբերելու դեպի երկու երկրների շուկաներ դրանց դյուրացված մուտքի համար։
Նախարարներն անդրադարձել են նաեւ «Մեղրի» եւ «Արաս» ազատ տնտեսական գոտիների համագործակցությանը։ Ըստ պայմանավորվածության՝ «Մեղրի» ԱՏԳ-ում հատուկ տարածք կհատկացվի իրանական սերտիֆիկացման ծառայությունների համար։
Հանդիպման ընթացքում քննարկվել են նաեւ արդյունաբերության ոլորտում համագործակցության հեռանկարները եւ համատեղ արտադրությունները, որոնց պարագայում Հայաստանը կհանդիսանա հարթակ այլ շուկաներ մուտք գործելու համար։