Նոր Նորքի հանրակացարանի շենքում հրդեհն ինչից է առաջացել, դեռ պարզ չէ: NEWS.am-ի հետ զրույցում հանրակացարանի բնակիչներից մեկը պատմել է, որ հրդեհված բնակարանի բնակիչները մինչեւ այժմ չեն կարողանում հասկանալ, թե ինչից կարող էր առաջանալ հրդեհը:
«Բնակարանի տերը՝ Շաքեն, եկել էր ինձ հյուր, բայց հեռախոսը մոռացել էր: Գնաց վերեւ, որ հեռախոսը վերցնի, մի քանի վայրկյանից հետո լացելով եկավ, ասաց, որ սենյակը վառվում ա: Վերեւ բարձրացա, տեսա՝ սենյակից բոց է դուրս գալիս, փրկարարներ կանչեցինք»,- պատմել է նա:
Կինը նաեւ ասել է, որ բարձրանալով 6-րդ հարկ, նկատել են, որ հրդեհվող բնակարանին կից սենյակում աղջիկ կա. «Աղջիկներից մեկն էլ սենյակում էր մնացել, պարսիկ ուսանող էր, տղերքին խնդրեցինք, որ օգնեն: Ծուխն այդ սենյակ էր լցվում, պատուհանից իջեցրին նրան: Շաքեն եւ այդ աղջիկն հիմա նորմալ վիճակում են, չեն ցանկացել տեղափոխվել հիվանդանոց, ծխահարվել էին»:
Ավելի վաղ NEWS.am-ը հայտնել էր, որ Երեւան քաղաքի Մոլդովական փողոցի 29/6 հասցեում գտնվող հանրակացարանում հոկտեմբերի 10-ին հրդեհ է բռնկվել: Հայտարարվել էր հրդեհի բարդության «ԲԻՍ-1» աստիճան: Փրկարարները տարհանել էին շենքի 16 բնակչի, որոնցից 4-ին՝ ավտոսանդուղքի օգնությամբ: