Հայաստանը արագ տեմպերով  կորցնում է իր հարուստ  անտառածածկը, ընդ որում՝ դա տեղի է ունենում ոչ միայն բնական աղետների, այլ նաեւ մարդկանց ոչ ռացիոնալ աշխատանքի պատճառով։ Այդ մասին NEWS.am-ի հետ զրույցում նշում է Հայաստանում ՄԱԿ–ի Զարգացման ծրագրի մշտական ներկայացուցչի տեղակալ Դմիտրի Մարյասինը։ Նրա փոխանցմամբ, ՄԱԿ-ը անտառների պաշտպանության ծրագիրն արդեն իսկ իրակացվում է, իսկ վերջերս ՌԴ ֆինանսավորմամբ կառավարության հավանությանն արժանացավ անտառներում հրդեհների կանխման ծրագիրը, որը պատրաստվել էր մինչեւ Խոսրովի անտառում հրդեհի բռնկվելը։

Ընդ որում, անտառների հրդեհները, Մարյասինի խոսքով, սխալ եւ անօրինական հատումների արդյունք են, իսկ իրենք նախատեսում են ոչ միայն սխալ հատումների նվազեցում, այլ նաեւ անտառներին մոտ բնակվող  գյուղական բնակչության ներգրավում անտառների պահպանության գործում։

Ինչ վերաբերում է Նաիրիտի հրդեհին, ապա միջազգային փորձագիտական խումբը, որը Հայաստան էր ժամանել գնահատելու քիմիական վտանգի հետ կապված իրավիճակը «Նաիրիտ» գործարանում, շուտով հանդես կգա զեկույցով։  Մայրասինի խոսքով,   ՄԱԿ-ը պատրաստ է  համագործակցել, եթե ՀՀ կառավարությունը զեկույցի ուսումնասիրման արդյունքում որոշի  իրենց դիմել։ Մարյասինը նաև հիշեցրեց, որ Նուբարաշենի թունաքիմիկատների գերեզմանոցից ՄԱԿ-ը հաջողությամբ իրականացնում է թունավոր նյութերի հանման, հավաքման, փաթեթավորման եւ վերացման ծրագիր։