Գերագույն ռադայի շենքի մոտ բողոքի ակցիաների կազմակերպման հետեւում կանգնածներին արյուն եւ անկայունություն էր պետք։ Այս մասին ասել է Ուկրաինայի նախագահ Պյոտր Պորոշենկոն, փոխանցում է «112 Ուկրաինան»։
Պորոշենկոն պնդում է, որ հանրահավաքի կազմակերպիչների պահանջները ձեւական էին, իսկ նրանց նպատակը երկրի ներքաղաքական վիճակի ապակայունացումն է եղել։
«Ես ուզում եմ ձեր ուշադրությունը հրավիրել, որ գլխավոր կազմակերպիչները ցույց տվեցին, որ ձեւական պահանջները միայն ծխի քող էին։ Գործողությունների իրական պլանը Ուկրաինայում իրավիճակի ապակայունացումն էր։ Ուկրաինայի անվտանգության խորհուրդը, Ազգային ոստիկանությունը գտել են թաքստոցներ, պահեստներ, որտեղ եղել են արդեն պատրաստի զենքեր եւ պայթուցիկներ։ Նրանք մշտապես սադրել են իրավապահներին, քանի որ նրանց ոչ թե բարեփոխումներ էին պետք կամ փոփոխություններ, այլ արյուն»,– ասել է Պորոշենկոն։