Կառավարությունը աշխատավարձերի ու թոշակների բարձրացման ուղղությամբ կսկսի մտածել 2019 թվականից: Այս մասին NEWS.am-ի հետ զրույցում նշել է Ազգային ժողովի Հանրապետական խմբակցության քարտուղար Գագիկ Մելիքյանը՝ հիմնվելով կառավարության այն քայլերի վրա, որոնք պետք է հետագայում հանգեցնեն դրան: Այդ ծրագրերի ենթադրյալ արդյունքները, ըստ Մելիքյանի, շարքային քաղաքացու համար առայժմ տեսանելի չեն լինի եւ 2018 թվականի բյուջեով կենսաթոշակների ու աշխատավարձերի բարձրացում նախատեսված չէ:
«Թոշակները եւ աշխատավարձերը բարձրացնելու նպատակով արտադրության արդյունավետության եւ արտադրողականության բարձրացման հստակ նախանշաններ արդեն զգում ենք, որը կբերի բյուջեի եկամտային մասի ավելացում: Հաջորդ տարվանից՝ 2019 թվականից, արդեն կունենանք թոշակների եւ աշխատավարձերի աճի արձանագրում: Միտումները տանում են դրան: Տնտեսական առաջընթացը տանում է դրան, որ 2019-ից այդ ուղղությամբ կմտածենք: Այն գործողությունները, որ կառավարությունը իրականացնում է, կբերի տնտեսվարողների համար աշխատանքային դյուրին պայմանների, որի հետեւանքը կլինի ներդրումային դաշտի ակտիվացումը, իսկ դրանք աշխատատեղերի ավելացման առումով դրական ազդակներ են»,-ընդգծեց Մելիքյանը։
Անդրադառնալով վերջին ամիսներին սպառողական որոշ ապրանքների շեշտակի թանկացմանը, պատգամավորն ասաց, որ դա միջազգային գնաճով է պայմանավորված եւ ժամանակավոր բնույթ է կրում:
«Կարագի եւ որոշակի սննդամթերքի, բենզինի գները բարձրացել են: Ժամանակավոր երեւույթներ են, իմ կարծիքով այս ընթացքում սրանց լուծման առումով ճանապարհները կգտնենք: Տնտեսվարողները թանկացումների դեպքում առաջին արձագանքը, որ տալիս են, արտադրական պրոցեսում կոնկրետ կարագի ու մսամթերքի առումով, արտադրական աճ ունենալն է, որը կբերի գների նվազման: Այդ արձագանքը հնարավոր է, որ եկող տարվա ընթացքում տեսնենք: Հնարավոր չէ, որ մսի թանկացման դեպքում անասնագլխաքանակի աճ չարձանագրենք: Դա էլ իր ազդեցությունը կունենա գների նվազման վրա»,-ասաց ՀՀԿ-ական պատգամավորը։