Փոքր բիզնեսից չի կարելի ԱԱՀ հարկել գոնե էլի 4-5 տարի: Հոկտեմբերի 24-ին ԱԺ-ում այս մասին հայտարարեց «Ծառուկյան» դաշինքից ԱԺ փոխխոսնակ Միքայել Մելքումյանը՝ ներկայացնելով Հարկային օրենսգրքում փոփոխությունների օրինագիծը: Օրինագիծը բացասական եզրակացություն է ստացել տնտեսական հարցերով հանձնաժողովում, դեմ են արտահայտվել հանրապետական պատգամավորները:
2016 թվականի հոկտեմբերին ընդունված Հարկային օրենսգրքի համաձայն՝ ԱԱՀ է հարկվում տարեկան արդեն 115 մլն դրամ (240 հազար դոլար) շրջանառությամբ բիզնեսից: Մելքումյանի կարծիքով փաստաթղթաշրջանառության նոր պահանջները փոքր բիզնեսը չի հաղթահարի: Մելքումյանը նշեց, որ 2 տարի առաջ այս 115 մլն-ը մտցվել է որպես արտոնություն (58,35 մլն-ից բարձրացում), որ փոքր եւ միջին բիզնեսի սուբյեկտների (մոտ 60 հազար) համար հեշտ լինի հաշվապահությունը վարել եւ ցույց տալ իր իսկական շրջանառությունը: Սակայն այս 2 տարին ցույց տվեց, որ դա ընդհանուր առմամբ տեղի չունեցավ: Ճիշտ է, առեւտուրն ամբողջ երկում է կրճատվում, սակայն սա փոքր բիզնեսի համար մխիթարություն չէ: «Այս պատճառով նրան պետք է գոնե 4-5 տարվա ժամանակ տալ»,- եզրափակեց պատգամավորը: