ԱՄՆ Կոնգրեսի անդամ Ջուդի Չուն կրկին ԱՄՆ ֆինանսների նախարարությանը կոչ է արել Հայաստանի հետ սկսել կրկնակի հարկումից խուսափելու մասին նոր օրենքի շուրջ բանակցությունները:
Ֆինանսների նախարար Սթիվեն Մնուչինին ուղղված նամակում Կոնգրեսի ներկայացուցիչը նշել է, որ Հայաստանի հետ գոյություն ունեցող հարկային միակ համաձայնագիրը 1973 թվականին Խորհրդային Միության հետ ստորագրված պայմանագիրն է: Նրա խոսքով՝ հնացած համաձայնագիրը «ակներեւորեն չի բավարարում ժամանակակից պահանջներին»: 2016 թվականի փետրվարին Չուն Ամերիկայի Հայ դատի հանձնախմբի (ANCA) առաջնորդների հետ հանդիպումից հետո համանման կոչով է հանդես եկել նաեւ ֆինանսների նախկին նախարար Լյուին հղած ուղերձում:
Նշենք, որ կրկնակի հարկումից խուսափելու մասին համաձայնագրի առաջմղումը ANCA-ի առաջնահերթություններից մեկն է: ANCA-ի ներկայացուցիչ Րաֆֆի Քարաքաշյանը օրենսդրին շնորհակալություն է հայտնել՝ նշելով ANCA-ի վճռականությունն այս ուղղությամբ ջանքերը շարունակելու համար: