ՀՀ վարչապետ Կարեն Կարապետյանն այսօր՝ նոյեմբերի 10-ին, ընդունել է Եվրոպայի խորհրդի Տեղական եւ տարածքային իշխանությունների կոնգրեսի նախագահ Գուդրուն Մոսլեր-Թյորնշտրյոմին։
Կառավարությունից NEWS.am-ին հայտնում են, որ Կարեն Կարապետյանը կարեւորել է ԵԽ Տեղական եւ տարածքային իշխանությունների կոնգրեսի նախագահի այցը եւ մասնակցությունը Հայաստանում տեղական իշխանությունների 20-ամյակին նվիրված միջոցառմանը: Վարչապետի խոսքով՝ Հայաստանը բարձր է գնահատում ԵԽ հետ համագործակցությունը եւ ակտիվ մասնակցում է ԵԽ կանոնադրական եւ խորհրդատվական բոլոր մարմինների, այդ թվում նաեւ՝ Տեղական ու տարածքային իշխանությունների կոնգրեսի աշխատանքներին։
Տիկին Մոսլեր-Թյորնշտրյոմն արդյունավետ է համարել ԵԽ Տեղական եւ տարածքային իշխանությունների կոնգրեսի հետ ձեւավորված համագործակցությունը՝ նշելով, որ իրենց համար Հայաստանը վստահելի գործընկեր է: Նա տեղեկացրել է, որ արգասաբեր քննարկումներ է ունեցել ՀՀ տարածքային կառավարման եւ զարգացման նախարար Դավիթ Լոքյանի հետ, ծանոթ է ոլորտում կատարվող բարեփոխումներին եւ այդ գործընթացում աջակցությունը շարունակելու պատրաստակամություն է հայտնել:
Վարչապետն ու ԵԽ Տեղական եւ տարածքային իշխանությունների կոնգրեսի նախագահը մտքեր են փոխանակել Հայաստանում տեղական ժողովրդավարության ամրապնդման հարցերի շուրջ:
Կարեն Կարապետյանը ներկայացրել է տարածքային կառավարման եւ տեղական ինքնակառավարման ոլորտում կառավարության նախաձեռնած բարեփոխումների տրամաբանությունը, որոնց նպատակը համայնքային կառավարման մարմինների մտածելակերպի փոփոխությունն է, դրանց դերի բարձրացումը եւ որոշումների ընդունման առավել ամուր օղակի ձեւավորումը: Կառավարության ղեկավարը շնորհակալություն է հայտնել ոլորտի բարեփոխումներին Կոնգրեսի մշտական աջակցության համար, այդ թվում` 2016 թ. ստորագրված Հայաստան-Եվրոպայի խորհուրդ հետմոնիթորինգային երկխոսության ճանապարհային քարտեզի շրջանակում: