Եվրամիությունը երկուշաբթի արգելել է Վենեսուելային զենքի եւ սարքավորումների մատակարարումը, որոնք կարող է օգտագործվել բռնաճնշումների նպատակով, հայտնում է «ՌԻԱ Նովոստի»–ն՝ վկայակոչելով ԵՄ Խորհրդին։
«Խորհուրդն այսօր միանշանակ որոշում է կայացրել սահմանափակող միջոցներ ընդունել՝ ընդգծելով այդ երկրում տիրող իրավիճակի կապակցությամբ իր մտահոգությունը։ Դրանց թվում են զենքի եւ համապատասխան սարքավորումների մատակարարման էմբարգոն, որը կարող է օգտագործվել ներքին ճնշումների համար»,– ասված է ԵՄ անդամ երկրների ԱԳ նախարարների հայտարարության մեջ։
Բացի այդ, ընդունվել է նորմատիվային փաստաթուղթ, որը դյուրացնում է մուտքի եւ ակտիվների սառեցման արգելք նախատեսող անհատական պատժամիջոցներ մտցնելը։
Բուն անհատական պատժամիջոցներն առայժմ դեռ սահմանված չեն։
Հայտարարության մեջ նշվում է, որ ընդունված միջոցները «կարող են կիրառվել փուլ առ փուլ եւ ճկունորեն եւ ուղղվել նրանց դեմ, ովքեր չեն հետեւում իրավունքի գերակայության ժողովրդավարական սկզբունքներին եւ խախտում են մարդու իրավունքները»։
«Այդ միջոցները կարող են չեղարկվել՝ կախված երկրի իրավիճակից, մասնավորապես, վստահության արժանացած ու նշանակալի բանակցությունների անցկացման, ժողովրդավարական ինստիտուտների հարգանքի, ընտրությունների անցկացման գրաֆիկի համաձայնեցման եւ քաղբանտարկյալների ազատ արձակման դեպքում»,- հայտարարել են նախարարները։
Վենեսուելայում երկրի նախագահ Նիկոլաս Մադուրոյի քաղաքականության դեմ զանգվածային բողոքների հետեւանքով այս տարվա գարնանն ու ամռանը զոհվել է ավելի քան 120 մարդ։
