Լիբանան-Սաուդյան Արաբիա առճակատումն պետք է դիտարկել Իրան-Սաուդյան Արաբիա տարածաշրջանային մրցակցության համատեքստում։ Այդ մասին այսօր՝ նոյեմբերի 13-ին, լրագրողների հետ հանդիպման ժամանակ ասաց Արա Պապյանը՝ խոսելով Սաուդյան Արաբիայի եւ Լիբանանի միջեւ ընթացող գործընթացների մասին։
«Իրավիճակը հիշեցնում է Սառը պատերազմի ժամանակաշրջանը, երբ ուղիղ առճակատման փոխարեն ականատեսն էինք լինում փոքր, տեղային բախումների։ Մինչ այս մի կողմից հուսիները Եմենում, Սիրիայի դեպքերը, հիմա էլ Լիբանանը։ Այլ հարց է, որ Լիբանանի եւ Իրանի հետեւում Ռուսաստանն է, իսկ Սաուդյան Արաբիային սատարում է ԱՄՆ-ն»,-նշում է նա։
Արա Պապյանի խոսքով, Սաուդյան Արաբիայում ներսում ընթացող գործընթացներն էլ պետք է դիտարկել Մուհամմադ իբն Սալման ալ Սաուդի ձեռքում իշխանությունը կենտրոնացնելու համատեքստում։ «Կաշառակերությունը զուտ պատրվակ է: Ավելին՝ կաշառակերությունը նոր չէ, որ կա Սաուդյան Արաբիայում, իսկ 208 մարդու ձերբակալումը պայմանավորված են ավելի խորքային պատճառներով»,-շեշտեց նա։
Ամփոփելով իր խոսքը, նա ընդգծեց, որ մեզ ձեռնտու չէ Իրանի մեկուսացումը, ավելին Լիբանանում էլ ունենք մեծաթիվ հայ համայնք եւ այն պարագայում, երբ Սիրիայում շատ քիչ հայեր են մնացել, պետք է պահել գոնե Լիբանանը։
Նշենք, որ օրեր առաջ Լիբանանի վարչապետ Սաադ Հարիրին Սաուդյան Արաբիյից հայտարարեց, թե հրաժարական է տալիս, քանի որ մտահոգված է իր կյանքի եւ անվտանգության համար։ Նա մինչ օրս չի վերադարձել հայրենիք։ Դրանից հետո Լիբանանի եւ արաբական մի քանի երկրների հարաբերությունները կտրուկ սրվեցին, Սաուդյան Արաբիան եւ Քուվեյթը իրենց քաղաքացիներին հորդորել են լքել Լիբանանը։ Լիբանանի նախագահ Միշել Աւոնը նշել է, թե իրենք չեն ընդունում Հարիրիի հրաժարականը եւ սպասում են նրա պարզաբանումներին Բեյրութում։
