Ռուսաստանը եւ Թուրքիան ձգտում են սիրիական հակամարտության քաղաքական կարգավորմանը: Այս մասին հայտարարել է Թուրքիայի արտաքին գործերի նախարար Մեվլութ Չավուշօղլուն, ով թուրքական պատվիրակության կազմում մասնակցում է երկու երկրների նախագահների՝ Վլադիմիր Պուտինի եւ Ռեջեփ Թայիփ Էրդողանի բանակցություններին, հաղորդում է ՏԱՍՍ- ը:
«Մենք ունենք տարածաշրջանային խնդիրներ, որոնց շուրջ Թուրքիան եւ Ռուսաստանը միասին պետք է աշխատեն: Սիրիան դրանցից մեկն է: Մենք Աստանայում կայացած բանակցություններում ունենք մի շարք ձեռքբերումներ եւ այժմ մեծ ուշադրություն ենք դարձնում քաղաքական լուծումների որոնմանը (Սիրիայում հակամարտությանը): Ռուսաստանի եւ Թուրքիայի փոխգործակցությունը անհրաժեշտ է Սիրիայում կայունության եւ անվտանգության հաստատման համար: Մեր պատվիրակություններն աշխատում են այդ ուղղությմաբ», - ասել է Չավուշօղլուն:
Նախարարը մեկնաբանել է Թուրքիայի նախագահի հայտարարությունն այն մասին, որ ՌԴ-ն եւ Միացյալ Նահանգները պետք է Սիրիայից զորքերը դուրս բերեն: «Նախագահ Էրդողանը պարզապես հիշեցրել է, որ ԱՄՆ-ն եւ Ռուսաստանը այդտեղ ցամաքային զորքեր ունեն: Եթե ռազմական գործողություն անհրաժեշտ չէ, ապա դա միայն կախված է նրանցից: Դա պարզապես քաղաքական կարգավորման մասին մեկնաբանություն է», - ասել է նա: