2018թ.-ի պետական բյուջեի ծրագրի իրականացումը համախառն պահանջարկի վրա կունենա զսպող ազդեցություն: Այս մասին այսօր՝ նոյեմբերի 15-ին, խորհրդարանում հաջորդ տարվա նյուջեի նախագծի քննարկման ժամանակ ասաց Կենտրոնական բանկի նախագահ Արթուր Ջավադյանը:
«Նախատեսվում է ՀՆԱ-ում բյուջեի պակասուրդի նվազում՝ 3.6 տոկոսի դիմաց 2.7 տոկոս: Շատ ենք կարեւորում պարտքի կառուցվածքի բարելավումը, մասնավորապես արտաքին պարտքը ներքին պարտքով փոխարինման միջոցով: Միեւնույն ժամանակ կարեւորում ենք կապիտալի շուկայի զարգացմանն ուղղված ներքին պարտքի կառավարման մեխանիզմների ներդրումը, մասնավորապես ներքին պարտքի գործիքակազմի ընդլայնման միջոցով: Այսպիսով, գնահատվում է, որ 2018թ.-ի պետական բյուջեի ծրագրի իրականացումը համախառն պահանջարկի վրա կունենա զսպող ազդեցություն, որի պարագայում տնտեսական աճի ապահովման հիմնական բեռն ընկնում է լայնածավալ կառուցվածքային բարեփոխումների վրա: Այդ ամենը զուգակցելով հարկաբյուջետային քաղաքականության ծրագրերի շարունակականության ապահովմամբ՝ հիմքեր կտսեղծվեն տնտեսական աճի համար»,- ասաց Արթուր Ջավադյանը:
Հարակից զեկուցողին պատգամավորները հարցեր չունեին:
