Թուրքիան մեծացնում է Սիրիայում իր ներկայությունն ու ազդեցությունը: Նոյեմբերի 16-ին լրագրողների հետ հանդիպման ժամանակ այսպիսի կարծիք հայտնեց արեւելագետ Սարգիս Գրիգորյանը:
Նրա խոսքով՝ ակնհայտ է, որ Սիրիայում Թուրքիան եւ Ռուսաստանն իրենց գործողությունները համակարգում են: «Մենք Թուրքիայի ակտիվ ներքգրավվածություն ենք տեսնում Սիրիայի հակամարտությանը, եւ հատկապես Իդլիբում»,- նշեց արեւելագետը՝ հավելելով, որ սա տեղի է ունեցել Թուրքիայի, Ռուսաստանի, Իրանի եւ Սիրիայի միջեւ ձեռք բերված համաձայնության արդյունքում:
Արեւելագետը միաժամանակ նշեց, որ Սիրիայի տարածքում Թուրքիայի հիմնական խնդիրը քրդերն են: Նրա խոսքով՝ Սիրիայի տարածք Թուրքիայի ներխուժումը քրդական ուժերին թույլ տվեց առաջ շարժվել Աֆրինի ուղղությամբ, որը գերազանցապես քրդերով է բնակեցված եւ ռազմավարական կարեւորություն ունի: Այսպիսով, թուրքերը Աֆրինը փաստացի օղակի մեջ առան:
