Մեծ Բրիտանիայի կառավարությունը առաջիկայում Իրանին մոտ 400 միլիոն ֆունտ ստերլինգ կփոխանցի (մոտավորապես 527 միլիոն դոլար): Այս մասին ուրբաթ հաղորդում է Reuters գործակալությունը՝ հղում անելով Լոնդոնում Իսլամական Հանրապետության դեսպան Համիդ Բաեդինեջադին, հաղորդում է ՏԱՍՍ-ը:
«Գումարի զգալի մասը Մեծ Բրիտանիան առաջիկա օրերին պետք է Իրանի Կենտրոնական բանկ փոխանցվի», - ասել է դեսպանը:
Ավելի վաղ, The Telegraph թերթը, վկայակոչելով իր աղբյուրներին հայտնել էր, որ բրիտանական իշխանությունները մտադիր են Իրանին շուրջ 400 մլն ֆունտ փոխանցել՝ որպես «բարի կամքի» արտահայտություն: Ըստ թերթի՝ խոսքը1970-ական թվականներին Իրանի կառավարության կողմից Միացյալ թագավորությանը փոխանցված դրամական միջոցների մասին է:
Թեհրանը Մեծ Բրիտանիայի կառավարությանը 650 միլիոն ֆունտ է փոխանցել ռազմական տեխնիկայի մատակարարման պայմանագրով, բայց պայմանագրի պայմանները Լոնդոնի կողմից չեն կատարվել Իրանի հեղափոխության պատճառով: