Իրանը չի ձգտում «գերիշխել» Մերձավոր Արեւելքում եւ փորձում է օգնել տարածաշրջանում վերականգնել խաղաղությունն ու անվտանգությունը: Այս մասին ֆրանսիացի գործընկերոջ՝ Էմանուել Մակրոնի հետ հեռախոսազրույցում հայտարարել է Իրանի նախագահ Հասան Ռոհանին, փոխանցում է Tasnim-ը:
Նրա խոսքով՝ Իրաքում ու Սիրիայում Իրանի ներկայությունը կապված է ահաբեկչության դեմ պայքարի համար այդ երկրների հրավերի հետ:
«Իրանը չի ձգտում գերիշխել տարածաշրջանում: Իրանի գլխավոր նպատակը տարածաշրջանում ահաբեկչության դեմ պայքարն է, եւ մենք կարծում ենք, որ ԻՊ-ից հետո անհրաժեշտ է պայքարել մյուս ահաբեկչական խմբավորումների դեմ: Իրանի նպատակը տարածաշրջանում խաղաղությանն ու անվտանգությանն օգնելն է ու երկրների անջատումը կանխելը, եւ մեր կարծիքով՝ տարածաշրջանի բոլոր երկրներում որոշում կայացնող հիմնական դեմքերը այդտեղ ապրող մարդիկ են»,- ասել է Ռոհանին:
Մակրոնն իր հերթին կոչ է արել Թեհրանի եւ Փարիզի միջեւ երկկողմանի կապերը բոլոր ոլորտներում ընդլայնել: Նա նշել է, որ Իրանի միջուկային ծրագրի համաձայնագրի բոլոր կողմերը պետք է օգնեն համաձայնագիրը պաշտպանելուն:
Նրա խոսքով՝ Ֆրանսիայի կառավարությունը բոլոր ջանքերը ներդնում է, որ բանկերին եւ ձեռնարկատերերին օգնի ամրապնդելու Իրանի հետ իրենց կապերը:
Մակրոնը նաեւ հույս է հայտնել, որ Եմենի եւ Սիրիայի հակամարտությունները մոտ ժամանակներում կկարգավորվեն:
Ֆրանսիայի նախագահը իր իրանցի գործընկերոջը հրավիրել է հաջորդ ամիս Փարիզ այցելել կլիմայի փոփոխության վերաբերյալ միջազգային համաժողովին մասնակցելու համար: