Նոյեմբերի վերջին Լոս Անջելեսի մոտորշոուի ժամանակ Infiniti ընկերությունը կներկայացնի նոր մոդելը: Նրա մասին հանգամանալից տեղեկատվություն առայժմ չկա. արտադրողը հրապարակել է միայն մեկ թիզեր, որում, ամենայն հավանականությամբ, ամենագնաց է պատկերված, փոխանցում է Lenta-ն:
Infiniti-ում այդ մոդելի մասին միայն ասում են, որ այն կլինի ավտոմեքենա, որը ցույց կտա մակնիշի դիզայներական կոնցեպցիայի զարգացումները: Այն կստանա «միանգամայն նոր տեխնոլոգիաներ» եւ այդ դասի ամենաընդարձակ ինտերիերը:
Ավելի վաղ հաղորդվել էր, որ Լոս Անջելեսի համար Infiniti ընկերությունը պատրաստում է իր պատմության մեջ «ամենակատարյալ» մոդելը: Արտադրողը ծրագրել էր նոր շասիի վրա կառուցել էլեկտրամոբիլ, որը հոսքագծում կհայտնվի 2019-ին: Արդյո՞ք նորույթը, որի առաջին ցուցադրությունը տեղի կունենա ԱՄՆ-ում մոտորշոուի ժամանակ, առնչություն ունի այդ էլեկտրամեքենայի հետ՝ առայժմ դեռ պարզ չէ:
