Վանաձորի քաղաքապետ Մամիկոն Ասլանյանը «Հայկական վերածնունդ» կուսակցության Վանաձորի տարածքային կառույցի անդամներին բացի քաղաքապետի առաջին տեղակալի պաշտոնից, այլ պաշտոն չի խոստացել, այդ թվում քաղաքապետարանի կումունալ բաժնի պետի պաշտոնը: Այս մասին Վանաձորի ավագանու այսօրվա՝ նոյեմբերի 23-ի նիստից հետո NEWS.am-ի հետ զրույցում նշել է Վանաձորի քաղաքապետ Մամիկոն Ասլանյանը:
«Ես պատի տակի խոսակցությունները վաղուց չեմ մեկնաբանում»,- նշեց նա՝ հավելելով, որ նման պայմանավորվածություն չի եղել:
«Չի խոստացվել, արխեին մնացեք»,- հավելեց քաղաքապետի կողքին գտնվող քաղաքապետի նորանշանակ առաջին տեղակալ Արկադի Փելեշյանը:
Մամիկոն Ասլանյանի խոսքով, համաձայնագրում նշված է միայն քաղաքապետի առաջին տեղակալի պաշտոնի մասին, բայց կարող են դրանից դուրս էլ այլ պաշտոնների վերաբերյալ համաձայնություններ լինել. «Մեր կողմից էլ շատ պաշտոններ կլիներ, Արկադի Փելեշյանի կողմից էլ, «Լուսավոր Հայաստանի» կողմից էլ հետագայում: Ընթացքում կադրային շարժեր միշտ լինում են, չի կարելի բացառել պաշտոն տալը կամ չտալը»:
Մամիկոն Ասլանյանը նշեց, որ դեռեւս չեն որոշել. թե ինչ պաշտոն կառաջարկվի քաղաքապետի նախկին առաջին տեղակալ Արտյոմ Գրիգորյանին:
Դիտարկմանը, որ խոսակցություններ կան, որ նա կարող է նշանակվել քաղաքապետի խորհրդական, Ասլանյանն արձագանքեց. «Հա, խոսակցություն եղել ա, բայց որոշված չի»:
Ինչ վերաբերում է ՍԴ որոշումից հետո Վանաձորի ավագանին լուծարելու հարցով «Լուսավոր Հայաստանի»՝ կառավարությանը դիմելուն, քաղաքապետն ուղղակի հրաժարվեց մեկնաբանել. «Ես չեմ մեկնաբանում»,- նշեց նա:
Ավելի վաղ NEWS.am-ը հայտնել էր, որ օրեր առաջ Մամիկոն Ասլանյանի եւ ՀՎԿ Վանաձորի կառույցի միջեւ համագործակցության հուշագիր է ստորագրվել, որի համաձայն, Վանաձորի ավագանու ՀՎԿ անդամները համաձայնել են դադարեցնել բոյկոտը եւ մասնակցել ավագանու նիստերին, դրա դիմաց ստացել են փոխքաղաքապետի պաշտոնը:
Բանն այն է, որ ՍԴ-ն հակասահմանադրական էր ճանաչել ՏԻՄ մասին օրենքի այն դրույթը, որը թույլ էր տալիս Մամիկոն Ասլանյանին Վանաձորի ագավանու անդամների կեսից պակասի առկայության պարագայում նիստեր անցկացնել եւ որոշումներ կայացնել: Քանի որ «Լուսավոր Հայաստանը», ԲՀԿ եւ «Հայկական վերածնունդը» բոյկտում էին ավագանու նիստերը, քվորում չէր հաջողվում ապահովել:
Եթե ՀՎԿ-ն չգնար համագործակցության Մամիկոն Ասլանյանի հետ, շատ հավանական է, որ բանը հասներ վանաձորի ավագանու լուծարմանը եւ նոր ընտրությունների նշանակմանը:
«Լուսավոր Հայաստան» կուսակցությունն իր հերթին դիմել է կառավարությանը՝ ՍԴ որոշումը կատարելու եւ Վանաձորի ավագանին լուծարելու հարցով: