ՌԴ Ամուրի մարզի «Վոստոչնի» տիեզերակայանից «Մետեոր-Մ»-ի արձակումից հետո արբանյակի վթարի պատճառը կարող է լինել մարդկային գործոնը, հայտնում է «Ինտերֆաքսը»՝ վկայակոչելով հրթիռատիեզերական ոլորտում աղբյուրին:
«Նախնական տեղեկություններով՝ սխալ է տեղի ունեցել տանող հրթիռի թռիչքային հանձնարարությունում եւ «Ֆրեգատ» բլոկում, որի հետեւանքով առաջին ազդակը տրվել է ոչ այն կողմնորոշմամբ, ինչպիսին անհրաժեշտ էր, այդ պատճառով անջատվող բլոկն արբանյակի հետ մտել է մթնոլորտ եւ ընկել Ատլանտյան օվկիանոսը»,- ասել է աղբյուրը:
Կրեմլում «Ռոսկոսմոսից» տեղեկություն են սպասում՝ կապված «Մետեոր» արբանյակի հետ եւ կոչ են անում եզրակացություններ կատարելիս չշտապել:
«Ներկայումս ընթանում է «Մետեոր» սարքը թիրախային ուղեծիր դուրս բերելիս առաջացած իրավիճակի վերլուծության աշխատանքային խմբի նիստը»,- ասել է ՏԱՍՍ գործակալության զրուցակիցը:
