Բելգիան ՄԱԿ-ի անվտանգոության խորհրդում ոչ մշտական անդամի թեկնածու է․ իսկ քվեարկությունը կլինի 6 ամսից։ Այս մասին, այսօր՝ նոյեմբերի 30-ին, լրագրողների հետ հանդիպման ժամանակ նշել է Հայաստանում Բելգիայի Թագավորության արտակարգ եւ լիազոր դեսպան Ժան-Արթուր Ռեժիբոն (նստավայրը՝ Մոսկվա)։
Նա հույս հայտնեց, որ Հայաստանը եւս քվեարկի իրենց թեկնածության օգտին։
Դեսպանի խոսքով, կան մի քանի պատճառներ, թե ինչու է Բելգիան ցանկանում դառնալ ՄԱԿ-ի Անվտանգության խորհրդի ոչ մշտական անդամ։ «Բելգիան շատ վնասներ է կրել պատերազմներից, բնականաբար չենք սիրում պատերազմ։ Դա պատճառներից մեկն է, որ Բելգիան դրել է իր թեկնածությունը ՄԱԿ-ի ԱԽ անդամության համար։ Հակամարտությունները լուծելու լավագույն տարբերակը երկխոսությունն է։ Տարակարծությունը նորմալ է, անգամ երկու մոտ ընկերների մեջ դա կարող է լինել, բայց կարեեւոր է դա հաղթահարելը։ Պետք է լուծումը բավարարի բոլոր կողմերին։ Մեր փորձը ուզում ենք բերել ՄԱԿ-ի Անվտանգության խորհուրդ։ Երկրորդ պատճառը մարդու իրավունքների եւ քաղաքացիների պաշտպանությունն է։ Երրորդը բնապահպանական խնդիրների վրա ուշադրություն սեւեռելն է»։
Անդրադառնալով Հայաստան-ԵՄ համաձայնագրին, նա ընդծեց․ «Մենք շատ ուրախ ենք,որ նախորդ շաբաթ ստորագրվել է ԵՄ-Հայաստան համաձայնագիրը։ Այս համաձայնագիրը թույլ կտա բարելավել Հայաստանի հարաբերությունները Բելգիայի եւ ԵՄ մյուս երկրների հետ։ Մի կողմից Հայաստանը ԵՏՄ անդամ է, մյուս կողմից ստորագրեց համաձայնագիր ԵՄ-ի հետ։ Հայաստանը կարող է կամուրջի դեր խաղալ այս երկու կազմակերպությունների միջեւ։ Դա մի դեր է, որը մենք ողջունում ենք»։