Մշակույթի նախարարությունը համաձայն է «Կինոյի մասին» օրենքի կառավարության ներկայացրած նախագծի ներկայիս տարբերակին: Այս մասին դեկտեմբերի 6-ին մամուլի ասուլիսի ժամանակ ասաց մշակույթի փոխնախարար Արթուր Պողոսյանը:
Օրինագիծը սեղմ ներկայացնելով՝ փոխնախարարը նշեց, որ օրենքը արտաքին ներդրումների համար բարենպաստ միջավայր կստեղծի, քանի որ արտոնություններ է նախատեսում զանգվածային ֆիլմերի արտադրության համար: Պարտադիր է դառնում տարիքային հանդիսատեսի նշման պահանջը (16+, 18+), բոլոր ֆիլմերը պետք է թարգմանվեն, որի իրականացման համար մեկ տարի կտրամադրվի:
Մտցվում է նա վարձույթ իրականացնելու համար վկայական, ինչպես ամբողջ աշխարհում է ընդունված: Վկայականը կգործի ԵՏՄ տարածում: Եթե լրացումներ եւ փոփոխություններ չլինեն, սպասվում է, որ օրենքը կընդունվի հաջորդ տարեսկզբին եւ կուղարվի ԱԺ:
Մեկնաբանելով նախագծի հետ կապված քննադատությունները՝ Արթուր Պողոսյանը նշեց, որ օրենքի մշակման գործընթացը սկսվել է մոտ 3 տարի առաջ: «Նախկինում մեզ մեղադրում էին ձգձգելու մեջ: Հիմա խոսում են հապշտապության մասին»,- նշեց նա՝ հավելելով, որ նախարարությունը քննարկումների համար բաց է, արդեն բազմիցս հանդիպումներ են կայացել կինոփորձագետների հետ:
Փոխնախարարի խոսքով՝ քննադատությունը, որ նոր օրենքով հաշվի չի առնվել ազգային կինոյի դրույթը, իրականությանը չի համապատասխանում: Կա նաեւ հայրենական արտադրության ֆիլմ տերմինը:
Պատասխանելով «Հայֆիլմի» ճակատագրին վերաբերող հարցին՝ Արթուր Պողոսյանը նշեց, որ վերականգնելու համար լուրջ ներդրումներ են անհրաժեշտ, եւ այնդուհանդերձ՝ այն վերականգնելու մտադրություն կա: