Եվրասիական տնտեսական միությունից դուրս գալու նախագծից հետո «Ելք» խմբակցության օրակարգում Սերժ Սարգսյանի վերաբերյալ դեռ որեւէ հարց չի ընդգրկվի մինչեւ իր ծրագրերի մասին Սերժ Սարգսյանը հստակ չհայտարարի: NEWS.am-ի հետ զրույցում խմբակցության պատգամավոր Արամ Սարգսյանը շեշտեց, որ իրենց համար թիվ մեկ հարցը գործող իշխանության վերարտադրությունն է, բայց դրա դեմ գործընթաց սկսելու համար անհրաժեշտ է Սերժ Սարգսյանի հստակ հայտարարությունը՝ իր թեկնածությունն առաջադրելո՞ւ է վարչապետի պաշտոնում, թե ոչ:
«Համար մեկ խնդիրը գործող իշխանության վերարտադրությունն է, բայց որպեսզի քայլ անես այդ ուղղությամբ, վերարտադրվող մարդը պիտի հստակ տեսակետ ասի, պիտի ասի, որ, այո, մնալու է: Մնալուց հետո կա ասելիք, որը կասի նաեւ «Ելքը», եւ քաղաքական գործընթաց կծավալի դրա ուղղությամբ ու հանրությանը տեղյակ կպահի»,-ասաց Արամ Սարգսյանը:
Հիշեցմանը, թե նոյեմբերի 24-ին Բրյուսելում Հայաստան-ԵՄ համաձայնագրի ստորագրման օրը Սերժ Սարգսյանը հայտարարել էր, որ այդ առումով դեռ չի պատկերացնում իր անելիքները, Արամ Սարգսյանն ասաց, որ իրականում ան իր անելիքները շատ լավ պատկերացնում էր Սահմանադրության հանրաքվեից առաջ. «Ինքը պատկերացնում էր եւ հայտարարել է սահմանադրական հանրաքվեից առաջ իր պատկերացումների մասին, որ վարչապետ չի դառնալու, ինչը ինձ դզում էր: Հիմա որ չի պատկերացնում, ես դա կապում եմ Եվրասիական տնտեսական միության հետ, որովհետեւ նա նայում է իր մյուս գործընկերներին՝ Նազարբաեւին, Լուկաշենկոյին, Պուտինին: Ասում է՝ ումից եմ պակաս, որ չդառնամ վարչապետ: Բայց քանի դեռ ինքը չի ասել, որ վարչապետ է դառնալու, լուրջ չի, որ ասենք՝ եթե ինքը էսպես անի, մենք էլ էսպես կանենք: «Եթե»-ն լուրջ քաղաքական կատեգորիա չէ»,-ընդգծեց Արամ Սարգսյանը:
Դիտարկմանը՝ իրենց համար հստակ չէ՞, որ Սերժ Սարգսյանը իշխանությունը որեւէ մեկին չի զիջելու, «Ելք»-ի պատգամավորն արձագանքեց. «Հստակ լինել-չլինելու վերաբերյալ յուրաքանչյուրը կարող է կանխատեսում անել, բայց դրա վրա ծրագրել ու հանրությանը բան ասել, ճիշտ չէ»:
Հիշեցնենք, որ 2018-ի ապրիլին Սերժ Սարգսյանը վայրէ դնելու նախագահի լիազորությունները, որից հետո երկիրն ամբողջությամբ անցնելու է խորհրդարանական կառավարման, որտեղ երկրի առաջին դեմքը լինելու է վարչապետը:
