Ռուսաստանն ու Թուրքիան կարծում են, որ ԱՄՆ վարչակազմի՝ Երուսաղեմը Իսրայելի մայրաքաղաք ճանաչելու որոշումն ապակայունացնում է իրավիճակը տարածաշրջանում: Այս մասին ռուս-թուրքական ամենաբարձր մակարդակով բանակցություններից հետո հայտարարել է Ռուսաստանի նախագահ Վլադիմիր Պուտինը, հաղորդում է ՏԱՍՍ-ը:
«Եվ´ Ռուսաստանը եւ´ Թուրքիան համարում են, որ Երուսաղեմը Իսրայելի մայրաքաղաք ճանաչելու եւ դեսպանատունն այդ քաղաք տեղափոխելու ԱՄՆ որոշումը չի օգնում Մերձավոր Արեւելքում իրավիճակի կարգավորմանը, այլ ընդհակառակը, ապակայունացնում է առանց այդ էլ բարդ իրավիճակը», - ասել է նա:
Նրա խոսքով՝ Էրդողանի հետ բանակցությունները գործնական եւ կառուցողական էին: «Մենք քննարկել ենք երկկողմ համագործակցության առանցքային հարցերը, ներառյալ ռազմավարական առեւտրատնտեսական եւ ռազմատեխնիկական նախագծերի իրականացումը: Նաեւ մտքեր ենք փոխանակել միջազգային եւ տարածաշրջանային օրակարգի արդիական հարցերի շուրջ», - Անկարայում կայացած համատեղ մամուլի ասուլիսում ասել է Պուտինը: