News
Լրահոս
News
Հինգշաբթի
Հոկտեմբեր 18
Տեսնել լրահոսը

2017 թվականը մոտեցրել է աշխարհը գիտական ֆանտաստիկ ապագային: Ներկայացնում ենք անցնող տարվա 10 ամենակարեւոր հայտնագործությունները:

Հայտնաբերվել է մոլորակ, որի վրա կարելի է ապրել

Մոլորակը, որի վրա տեսականորեն կարելի է ապրել, հայտնաբերել են եվրոպացի գիտնականները: Երկնային մարմինը գտնվում է Կետի համաստեղությունում եւ շատ ավելի մեծ է, քան Երկիր մոլորակը, ունի խիտ մթնոլորտ, իսկ մակերեսը հիմնականում ծածկված է ժայռերով: Մոլորակը, որը ստացել է LHS 1140b համարը, 11 անգամ ավելի մոտ է Արեւին, քան Երկիրը: Սակայն այն ստանում է Երկրի բնակիչների ստացած ջերմության եւ լույսի միայն կեսը: Հետեւաբար մթնոլորտը այս մոլորակի վրա ավելի շատ կարող է Մարս մոլորակը հիշեցնել, քան Երկիրը: Մոլորակը գտնվում է Երկրից 40 լուսատարի հեռավորության վրա:

Ստեղծվել է մետաղական ջրածին

Գիտնականները, օգտագործելով մոտ 5 միլիոն մթնոլորտային ճնշում, առաջին անգամ մետաղական ջրածին են ստեղծել: Իր մետաղական վիճակում ջրածինը կարող է գործել որպես իսկական գերհաղորդիչ: Տեխնոլոգիան հեղափոխություն կգործի բազմաթիվ ոլորտներում` էներգիայի կուտակումից մինչեւ հրթիռաշինություն: Ենթադրվում է, որ մետաղական ջրածինը մթնոլորտակայուն է: Սա նշանակում է, որ նորմալ շրջակա միջավայրի պայմաններում այն չի փոխի իր հատկությունները: Գիտնականները նաեւ նշում են, որ մետաղական ջրածինը կարող է գերհաղորդիչ լինել նույնիսկ սենյակային ջերմաստիճանում, ինչը թույլ կտա աննախադեպ արդյունքների հասնել էներգիայի փոխանցման եւ կուտակման ոլորտում:

Google-ը արհեստական ինտելեկտին սովորեցրել է հարմարվել բարդ միջավայրին

Հուլիսի 11-ին Google-ի արհեստական հետազոտության DeepMind բաժինը հոդված էր հրապարակել, որը ցույց էր տալիս, թե ինչպես են ընկերության մասնագետները սովորեցնում արհեստական ինտելեկտի (ԱԻ) ալգորիթմներին հարմարվել բարդ եւ փոփոխվող միջավայրին: DeepMind-ի մասնագետները կիրառել են ուժեղացված ինքնուսուցման մեթոդը (reinforcement learning, RL), որպեսզի համակարգիչը կարողանա սովորել տեղաշարժվել անծանոթ եւ բարդ միջավայրում: Այն ամենը, ինչ անում է գծերով նկարված «մարդը», ինքնուսուցման գործընթացի արդյունք է: DeepMind-ի ծրագրավորողները իրենց գործակալին հագեցրել են մի շարք վիրտուալ հաղորդիչներով, որոնց շնորհիվ նա կարող է պարզել իր ներկայիս գտնվելու վայրը եւ ստանալ շատ այլ տվյալներ շրջակա միջավայրի մասին: Իսկ համակարգիչը նոր շարժումներ ու տեղաշարժվելու ձեւեր է հորինում:

SpaceX-ը վերագործարկել է արդեն «գործածած» հրթիռը

SpaceX- ը հաջողությամբ գործարկել է արդեն օգտագործված Falcon 9 հրթիռը: Այս քայլը էլ ավելի կմեծացնի տիեզերակայանների հասանելիությունը՝ յուրաքանչյուր թռիչքի համար խնայելով ավելի քան 18 մլն դոլար: Հրթիռի արձակման առաջին փուլը հրթիռային համալիրի ամենաթանկ բաղադրիչներից մեկն է: Այն տասնյակ միլիոնավոր դոլարներ արժե: Falcon 9-ի վրա տեղադրված արբանյակի գործարկումը 62 մլն դոլար արժե, սակայն ժամանակի ընթացքում այդ գումարը կնվազի:

Նոր բեկում՝ քվանտային հաշվարկներում. 51 կուբիթանոց քվանտային համակարգիչ

Հուլիսի 28-ին ներկայացվել էր 51 կուբիթանոց  ռեկորդային քվանտային համակարգիչը, որը ճանապարհ է բացում դեպի տեխնոլոգիաների նոր կիրառում: Հարվարդի ռուս եւ ամերիկացի գիտնականները ստեղծել եւ փորձարկել են աշխարհի առաջին՝ 51 կուբիթից բաղկացած քվանտային համակարգիչը: Սարքը իր տեսակի մեջ ամենաբարդ համակարգն է: Քվանտային համակարգիչները հատուկ հաշվարկային սարքեր են, որոնց հզորությունը ուժեղանում է՝ վերջիններիս աշխատանքում քվանտային մեխանիկայի օրենքների կիրառման շնորհիվ: Բոլոր նման սարքերը բաղկացած են կուբիթներից՝ հիշողության բջիջներից եւ միեւնույն ժամանակ՝ պարզունակ հաշվողական մոդուլներից, որոնք կարող են իրենց մեջ պահել մեկի եւ զրոյի միջեւ գտնվող նշանակությունները:

AlphaGo արհեստական ինտելեկտը ապացուցել է GO խաղում իր առավելությունը մարդկանց հանդեպ

DeepMind-ի (պատկանում է Google/Alphabet-ին) կողմից մշակված արհեստական ինտելեկտի AlphaGo ծրագիրը 3-0 հաշվով եզրափակել է խաղերի շարքը աշխարհի ուժեղագույն խաղացող Քե Ցզեի դեմ: Սա վերջին միջոցառումն է, որտեղ խաղացել է AlphaGo-ն: DeepMind-ի հիմնադիր Դեմիս Հասաբիսը այս որոշումը բացատրել է նրանով, որ սա «Alpha Go-ի՝ որպես մրցակցական ծրագրի հնարավոր ամենաբարձր արդյունքն է»:

Գո խաղը խաղում են արդեն մոտ 3000 տարի, եւ մինչեւ վերջերս գիտնականները կարծում էին, որ արհեստական ինտելեկտը կարող է գերազանցել մարդուն միայն մի քանի տասնամյակ անց: Դա պայմանավորված է խաղին բնորոշ աբստրակցիայի բարձր մակարդակով: Իրադարձությունների զարգացման հնարավոր տարբերակների քանաքը չափազանց մեծ է՝ ընտրության մեթոդով լավագույն քայլը հաշվարկելու համար:

Երկրաբանները հայտնաբերել են Երկրի ութերորդ մայրցամաքը

Խաղաղ օվկիանոսի ջրերի հարավարեւելյան հատվածի տակ Զելանդիան է՝ Երկիր մոլորակի  ութերորդ մայրցամաքը: Այս եզրակացությանն են եկել Նոր Զելանդիայի, Ավստրալիայի եւ Նոր Կալեդոնիայի երկրաբանները:

Նոր մայրցամաքի մակերեսը մոտ 5 միլիոն քառակուսի կիլոմետր է, որի մեծ մասը՝ մոտ 94 տոկոսը, ջրի տակ է: Մայրցամաքի երկրային տարրերի շարքում են Նոր Կալեդոնիայի կղզիները, ինչպես նաեւ Հյուսիսային եւ Հարավային նորզելանդական կղզիները:

Գիտնականների կարծիքով՝ Զելանդիան սկսեց հնագույն Գոնդվանա սուպերմայրցամաքից անջատվել մոտ 100 միլիոն տարի առաջ: Դա հանգեցրել է երկրագնդի կեղեւի դեֆորմացիայի, որի արդյունքում մայրցամաքի մեծ մասը ջրի տակ է անցել: Երկրաբանները հաստատում են իրենց եզրակացությունները արբանյակային դիտարկումների միջոցով, մասնավորապես՝ գրավիմետրիայի, ըստ որի՝ Զելանդիայի տեղում մայրցամաքային, այլ ոչ թե օվկիանոսային կեղեւ կամ հրաբխային շերտեր են:

Քիմիկոսները ամբողջովին անտեսանելի թանաք են ստեղծել

Չինաստանի քիմիկոսներն ու ֆիզիկոսները հետազոտություններ են անցկացրել առաջին, ամբողջությամբ անտեսանելի թանաքի ստեղծման վերաբերյալ: Թանաքը իրեն որեւէ կերպ ցույց չի տալիս եւ անընկալունակ է հատուկ սարքերի համար:

«Անտեսանելի» թանաքի այսօր գոյություն ունեցող բոլոր տեսակները՝ «կաթնային թանաքամանից» մինչեւ բարձր տեխնոլոգիական ներկերը, որոնք օգտագործվում են թղթադրամների ու արժեթղթերի պաշտպանության համար, մի շատ կարեւոր թերություն ունեն: Աչքի համար նրանք աննկատ են միայն մի քանի դեպքում: Որպես կանոն, բոլոր նման թանաքները փայլում են, եթե դրանց նայեն ուլտրամանուշակագույն լույսով, իսկ որոշ գաղտնի գրառումներ  կարելի է հեշտությամբ կարդալ՝ ընդամենը շրջելով այլ անկյան տակ:

Շանհայի համալսարանի գիտնական Լյա Լին իր գործընկերների հետ միասին ստեղծել է նման ներկի բոլորովին նոր տարբերակ՝ փորձարկումներ կատարելով նանոնյութերի՝ համեմատաբար վերջերս հայտնաբերված երկու տեսակի հետ:

Մետաղաօրգանական կմախքները իրենցից բարդ պոլիմերային նյութ են ներկայացնում, որը իր կառուցվածքով մեղրաբջիջների է նման եւ բարձր ամրություն ունի: Մետաղաօրգանական պատյանները այսօր ակտիվորեն օգտագործվում են ֆիլտրերի ստեղծման համար, որոնք կարող են ածխաթթուներ կամ ջրածին որսալ, ինչպես նաեւ իրենց մեջ մեծ քանակությամբ գազ պահպանել:

Ֆիզիկոսները ստեղծել են աշխարհի առաջին «խոսող» թուղթը

Միչիգանի համալսարանի ֆիզիկոսները ներկայացրել են էներգաանկախ թուղթը, որը կարող է աշխատել եւ՛որպես խոսափող, եւ՛ որպես բարձրախոս: Ամերիկացի գիտնականների հայտնագործությունը կարող է դառնալ առաջին «թուղթը» խոսող թերթերի համար: Այն էներգաանկախ  բարակ եւ ճկուն թուղթ է, որն ունի բարձրախոսի եւ խոսափողի գործառույթներ: Թղթի վրա մեխանիկական ազդեցության դեպքում էլեկտրաէներգիա է արտադրվում:

Այս բարակ ճկուն թերթիկը կայծքարային հիմք ունի, որի վրա ֆերոէլեկտրոնային պոլիպրոպիլենի, արծաթի եւ պոլիմերային նյութերի շերտեր են դրված:

Մեխանիկական ազդեցության կամ դեֆորմացիայի դեպքում նյութը կարող է էլեկտրական լիցքեր արտադրել: Ըստ գիտնականների՝ այն կարող է միաժամանակ աշխատել եւ՛ որպես բարձրախոս, եւ՛ որպես խոսափող, քանի որ նյութը կարող է մեխանիկական էներգիան վերածել էլեկտրաէներգիայի եւ հակառակը:

Ստեղծվել է տեսախցիկ, որը կարող է տեսնել ճառագայթման բոլոր տեսակները

Գրաֆենի եւ քվանտային կետերի օգնությամբ Իսպանիայից ֆիզիկոսները թվային սենսոր են ստեղծել, որը կարող է ընկալել ինֆրակարմիր ճառագայթումները, ուլտրամանուշակագույն ճառագայթումները եւ տեսանելի լույսը միաժամանակ: Այս գրաֆեն-CMOS տեխնոլոգիան կարող է օգտագործվել շրջակա միջավայրին հետեւելու համակարգերում, ինչպես նաեւ անվտանգության համակարգերի, սմարթֆոնների արտադրության մեջ:

Ֆոտոնիկայի ինստիտուտի կատալոնացի գիտնականները ստեղծել են թվային սենսոր, որը բաղկացած է 3 շերտից: Լուսազգայուն մատրիցայի վրա մաքուր գրաֆենի շերտ է դրվում, որի վրա իրենց հերթին քվանտային կետեր են դրվում: Ի վերջո, ֆիզիկոսները ստացել են բարձր լուծման պատկերով հաղորդիչ: Այս սենսորը զգայուն է էլեկտրամագնիսական ալիքների լայն սպեկտրի հանդեպ՝ 300 նմ երկարությամբ ուլտրամանուշակագույն ճառագայթումներից ինչեւ 2000 նմ երկարությամբ ինֆրակարմիր ճառագայթումներ:

2017 թվականի ամենադաժան ահաբեկչական գործողությունները (վիդեո)

!
Այս նյութը հասանելի է նաև   Русский
Տպել
Կարդացեք նաև
Ամբողջը
Նեյրոցանցին սովորեցրել են Facebook-ի գրառումներից ճանաչել դեպրեսիան
Ըստ գիտնականների՝ այս ծրագիրը կարող է շատերին օգնել․․․
Երևանում մեկնարկում է կիբերսպորտի առաջնությունը Hearthstone խաղային դիսցիպլինայում
Առաջնության գլխավոր մրցավարն է լինելու լեգենդար Հակոբ STORMBOLT Անդրեասյանը...
Google-ը հրաժարվել է մասնակցել Էր Ռիադում անցկացվող ներդրումային համաժողովին
«Ապագա ներդրումային նախաձեռնություն» երկրորդ համաժողովը կանցկացվի հոկտեմբերի 23-25-ը Սաուդյան Արաբիայի մայրաքաղաքում…
Մահացել է Microsoft–ի հիմնադիրներից Փոլ Ալենը
Ալանը 1975 թվականին Բիլ Գեյթսի հետ հիմնադրել է Microsoft–ը...
Apple–ը գնել է օգտատերերի երաժշտական նախընտրությունները վերլուծող ընկերությունը. Reuters
Սա թույլ կտա Apple–ին իր օգտատերերին ավելի որակյալ առաջարկներ անել այս կամ այն երաժշտական ստեղծագործության առնչությամբ…
Ոչ միայն պարզապես կաշխատենք, այլ նաեւ նոր կադրեր կպատրաստենք. DISQO–ն մասնաճյուղ է բացում Հայաստանում
DISQO–ի ներկայացուցիչների խոսքով՝ նրանք երբեք չեն դիտարկի որպես մրցակից, իրենք ցանկանում են համագործակցել այլ ընկերությունների հետ, նրանց հետ համատեղ իրականացնել փոխշահավետ ծրագրեր…
Ամենաշատ
Partner news