Կառավարությունը նախատեսում է, որ Մեղրիի ազատ տնտեսական գոտում առաջիկա տարիներին 100- 150 մլն դոլարի ներդրում կլինի: Այս մասին, այսօր դեկտեմբերի 15-ին, Մեղրիի ազատ առեւտրի գտու բացումից առաջ, NEWS.am-ի հետ զրույցում նշեց Տնտեսական զարգացման եւ ներդրումների նախարար Սուրեն Կարայանը:
Նրա խոսքով, առաջին փուլում ազատ տնտեսական գոտին 2,5 հա տարածքի վրա է գործարկվում. <Երկրորդ փուլը կսկսվի հենց վաղվանից, որով նախատեսում ենք մոտ 70 հեկտարի վրա ընդլայնել ազատ տնտեսական գոտին: Մեր կանխատեսումներով, առաջիկա տարիներին 50-70 ընկերություններ կգրանցվեն որպես շահագործող կազմակերպություններ: Նախատեսվում է, որ այդ կազմակերպությունները 100-150 մլն դոլարի չափով ներդրումներ կիրականացնեն եւ կստեղծվի մոտ 1500 աշխատատեղ>,-ասաց նախարարը:
Սուրեն Կարայանը նշեց, որ ազատ տնտեսական գոտին միտված է զարգացնելու հայ-իրանական տնտեսական հարաբերությունները. <Սա լայն հնարավորություններ կստեղծի, որ այս հարթակի վրա հայ-իրանական համատեղ ձեռնարկություններ ստեղծվեն, միաժամանակ հայ-իրանական համատեղ ձեռնարկությունները միասին դուրս գան երրորդ երկրներ: Իրանցիները կարող են այս տարածաշրջանը դարձնել լուրջ տնտեսական կենտրոն>:
Նշենք, որ դեռ նախորդ տարի «Սյունիք ազատ տնտեսական գոտի» ՍՊԸ-ի եւ Տնտեսական զարգացման եւ ներդրումների նախարարության միջեւ կնքվել է պայմանագիր, որով ՍՊԸ-ն իրավունք է ստացել սկսել Ագարակում ազատ տնտեսական գոտու ձեւավորումը: Հայաստան-Իրան սահմանին ազատ տնտեսական գոտին պետք է բացվեր դեռեւս հոկտեմբերին: Տնտեսական զարգացման եւ ներդրումների նախարարի տեղակալ Հովհաննես Ազիզյանի ներկայացմամբ, 10 տարվա ընթացքում կանխատեսվում է, որ ընկերությունը ազատ տնտեսական գոտու ստեղծման մեջ կներդնի շուրջ 30 մլն դոլար: Իսկ 1-ին փուլի աշխատանքներում նախատեսվում է ներդնել 2.5-3 մլն ԱՄՆ դոլար:
Փոխնախարարի խոսքով, շատ ընկերություններ են հետաքրքրված ազատ տնտեսական գոտում ներդրումներ կատարելու եւ գործունեություն ծավալելու հարցում: Նշվում է, որ Հայաստան-Իրան սահմանին, Ագարակ քաղաքի մոտական տարածքում ստեղծվելիք ազատ տնտեսական գոտում գործունեությունը ծավալվելու է գյուղմթերքի, սննդի վերամշակումից մինչեւ նոր բարձր տեխնոլոգիական նյութերի արտադրություն, դեղագործություն եւ տեքստիլ արդյունաբերություն: Ազատ տնտեսական գոտում գործելու է մաքսակետ, արտադրական տարածք, բիզնես կենտրոն: Այդտեղ այցելուներն ապրանքները կգնեն առանց մաքսատուրքի: Սա Եվրասիական տնտեսական միության տարածքում ստեղծված 7 գոտիներից մեկն է լինելու, որում գործելու է նաեւ «Դյութի ֆրի» համակարգ:
