Աջակողմյան ղեկով ավտոմեքենաների վերաբերյալ Հայաստանի իշխանությունների որոշման նախագիծը խախտում է դրանց սեփականատերերի սահմանադրական իրավունքները: Այս մասին դեկտեմբերի 22-ին լրագրողների հետ հանդիպման ժամանակ հայտարարեց փաստաբան Տիգրան Քեյանը:
Հիշեցնենք, որ անցած շաբաթվա վերջին ներկայացված կառավարության որոշման նախագիծը հասարակական դժգոհություն էր առաջացրել: Որոշման նախագծի համաձայն՝ 2018 թվականի ապրիլի 1-ից նախատեսվում է արգելել աջակողմյան ղեկով տրանսպորտային միջոցների ներմուծումը եւ դրանց վերագրանցումը: Սա խախտում է երկրի Սահմանադրությամբ ամրագրված գույքի նկատմամբ քաղաքացիների իրավունքները:
Խոսելով «անվտանգության» նկատառումներով որոշումը արդարացնելու փորձերի մասին՝ Տիգրան Քեյանը նշեց, որ այդ դեպքում հարց է ծագում. եթե իշխանությունները մտահոգված են անվտանգության հարցով, ապա ինչո՞ւ ապրիլի 1-ից հետո ներմուծել անհնար է, իսկ վարել կարելի է: «Այդ դեպքում թող ամեն ինչ արգելեն: Հարցն այն է, որ բոլոր «վախեցնող» հանգամանքները հորինված են:
Այս որոշմամբ անվտանգության խնդիրը չի լուծվում: ԵՏՄ-ին արվող հղումներն եւս անհիմն են: Համապատասխան փաստաթղթերը արգելք չեն պարունակում: Հակառակը՝ Ռուսաստանի Հեռավոր Արեւելքում մեքենաների 90 տոկոսը աջակողմյան ղեկով է, եւ Հայաստանի ու Ռուսաստանի ճանապարհային երթեւեկության կանոնները գրեթե նույնն են»,- նշեց փաստաբանը:
Տիգրան Քեյանի խոսքով՝ փաստացիորեն որոշման նախագիծը վերաբերում է սահմանադրական նորմերին. «Ստացվում է, որ այս որոշումը արգելում է քաղաքացուն օգտագործել իր սեփականությունը: Եվ օրենքը չի կարող հետադարձ ուժ ունենալ, իսկ այս դեպքում ստացվում է, որ արգելքները կկիրառվեն այն մարդկանց նկատմամբ, ովքեր արդեն իսկ ձեռք են բերել աջակողմյան ղեկով ավտոմեքենաներ»: