Իսրայելը մի քանի պետությունների հետ իրենց դեսպանատները Երուսաղեմ տեղափոխելու հնարավորության մասին խորհրդակցություններ է անցկացնում: Այս մասին CNN-ին տված հարցազրույցում, որը հեռարձակվել է դեկտեմբերի 22-ին, հայտարարել է Իսրայելի վարչապետ Բենիամին Նեթանյահուն:
Նա վստահություն է հայտնել, որ այլ երկրները, Վաշինգթոնից հետո, կճանաչեն Երուսաղեմը որպես Իսրայելի մայրաքաղաք: «Մենք այժմ բանակցում ենք մի քանի երկրների հետ, որոնք լրջորեն քննարկում են Երուսաղեմի ճանաչման եւ դեսպանությունները Երուսաղեմ տեղափոխելու հարցը», - ասել է Նեթանյահուն:
Նա հրաժարվել է նշել, թե որ պետություններն են դրանք:
«Ես կարող եմ ասել, բայց չեմ ասի, քանի որ ուզում եմ հաջողության հասնել եւ կարծում եմ, դրա հավանականությունը մեծ է», - ասել է նա, հաղորդում է ՏԱՍՍ-ը:
Դեկտեմբերի 21-ին ՄԱԿ Գլխավոր ասամբլեան, ի պատասխան Թրամփի որոշմանը, 128 ձայների մեծամասնությամբ Երուսաղեմը որպես Իսրայելի մայրաքաղաք ճանաչումը դատապարտող բանաձեւ ընդունեց:
