Կնեսեթը հաստատել է «Երուսաղեմի մասին հիմնական օրենքում» կատարված լրացումը, որի համաձայն՝ կարգավորման մասին համաձայնագրի շրջանակում քաղաքի ցանկացած հատվածի փոխանցման համար կպահանջվի պատգամավորների երկու երրորդի ձայնը՝ 80, հայտնում է ՏԱՍՍ-ը՝ վկայակոչելով Իսրայելի խորհրդարանի մամուլի ծառայությանը:
Դրա հետ միաժամանակ Երուսաղեմի մասին օրենքի լրացված հոդվածը «հնարավոր է չեղարկել 61 պատգամավորական ձայնի մեծամասնությամբ»,- հավելել են խորհրդարանի մամուլի ծառայությունից:
Դեկտեմբերի 6-ին ԱՄՆ նախագահ Դոնալդ Թրամփը Երուսաղեմը ճանաչեց Իսրայելի մայրաքաղաք եւ կարգադրեց սկսել Թել Ավիվից ԱՄՆ դեսպանատունը Երուսաղեմ տեղափոխելու աշխատանքները: Երուսաղեմի կարգավիճակը պաղեստինա-իսրայելական հակամարտության առանցքային խնդիրներից մեկն է: Քաղաքի արեւելյան հատվածը իսրայելցիները գրավել են 1967 թվականի պատերազմի ժամանակ եւ պնդում են, որ Երուսաղեմն Իսրայելի «միասնական եւ անբաժանելի» մայրաքաղաքն է: Պաղեստինցիներն իրենց հերթին ցանկանում են քաղաքի արեւելյան հատվածն իրենց մայրաքաղաքը դարձնել: