«Զինված խմբի» գործով այս տարվա առաջին նիստը դեռ չմեկնարկած հետաձգվեց:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում «սովորության համաձայն» կարգադրիչները դահլիճի դուռը բացեցին 50 րոպե ուշացումով: Սա զայրացրեց ամբաստանյալներից Վահան Շիրխանյանի պաշտպան Հայկ Ալումյանին, նա սկսեց ուժգին հարվածել դահլիճի դռանը, զանգահարել դատավորի աշխատասենյակ, սակայն, տեսնելով, որ իր զանգերին չեն պատասխանում՝ հեռացավ դատարանի տարածքից:
Նիստի մեկնարկին դատավոր Արմեն Բեկթաշյանը ստիպված էր նիստը հետաձգել, քանի որ Ալումյանը ներկա չէր: Մինչեւ նիստը հետաձգել ամբաստանյալներից Նելլի Մինասյանի պաշտպան Ինեսա Պետրոսյանը տեղեկացրեց, որ իր պաշտպանյալը հունվարի 18-ին կեսարյան հատմամբ երեխա է ունենալու եւ հետեւաբար, նիստերին ներկայանալ չի կարող: Այնուամենայնիվ, դատավորը հաջորդ դատական նիստը նշանակեց հունվարի 26-ին՝ հույս ունենալով, որ ամբաստանյալը կկարողանա գալ նիստին:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել: Ավելի ուշ մեղադրանքներ առաջադրվեցին երկու տասնյակ անձանց: