Հունվարի 11-ին տեղի է ունեցել ԵԱՀԿ Մշտական խորհրդի նիստը, որի ընթացքում ելույթ է ունեցել ԵԱՀԿ գործող նախագահ` Իտալիայի արտգործնախարար Անջելինո Ալֆանոն:
Հայաստանի ԱԳՆ-ից NEWS.am-ին հայտնում են, որ ներկայացնելով ԵԱՀԿ իտալական նախագահության առաջնայնությունները՝ գործող նախագահն առանձնահատուկ անդրադարձ է կատարել ԵԱՀԿ տարածքում ձգձգված հակամարտությունների կարգավորման անհրաժեշտությանը եւ հաստատել իտալական նախագահության պատրաստակամությունն` աջակցելու ԼՂ հակամարտության կարգավորման գործընթացին՝ ԵԱՀԿ Մինսկի խմբի համանախագահներին աջակցելու միջոցով:
ԵԱՀԿ-ում ՀՀ մշտական ներկայացուցիչ Արման Կիրակոսյանն իր ելույթում ընդգծեց, որ ԵԱՀԿ տարածաշրջանի հակամարտությունները միանման չեն, եւ տարբերվում են նաեւ դրանց կարգավորման սկզբունքները եւ ձեւաչափերը: Այս տեսակետից արժեւորվեց իտալական նախագահության դիրքորոշումը՝ աջակցել հակամարտության կարգավորման առանձին ձեւաչափերի գործունեությանը:
Դեսպան Կիրակոսյանը նշեց նաեւ, որ Հայաստանն աջակցում է Մինսկի խմբի համանախագահների ջանքերին՝ կարգավորելու ԼՂ հակամարտությունը երեք սկզբունքների՝ ուժի կամ ուժի սպառնալիքի չկիրառման, տարածքային ամբողջականության եւ ժողովուրդների ինքնորոշման իրավունքի հիման վրա:
Առանձնահատուկ շեշտադրվեց շփման գծում լարվածությունը նվազեցնելու միջոցառումների, այդ թվում գործող նախագահի անձնական ներկայացուցչի գրասենյակի կարողությունների ամրապնդման եւ հետաքննության մեխանիզմի ստեղծման անհրաժեշտությունը, ինչպես նաեւ ընդգծվեց դիպուկահարներին շփման գոտուց հետ քաշելու անհրաժեշտությունը՝ ի կատարումն ԵԱՀԿ նախկին նախագահությունների եւ Մինսկի խմբի համանախագահների կոչերի:
Անդրադառնալով Երեւանյան գրասենյակի փակումից հետո ԵԱՀԿ հետ համագործակցությունը շարունակելու Հայաստանի պատրաստակամությանը՝ ՀՀ մշտական ներկայացուցիչը կարեւորեց «Հայաստանի հետ համագործակցության» ԵԱՀԿ ծրագրի իրականացումը եւ դրա ուղղությամբ իտալական նախագահության աջակցությունը: