![](img/news/04/32/36/default.jpg)
Հայաստանի գյուղատնտեսության նախարարի պաշտոնի համար քննարկվում է երեք թեկնածուի անուն: NEWS.am-ի տեղեկություններով, ներկայումս քննարկվում է Հայաստանի ագրարագյուղացիական միության նախագահ Հրաչ Բերբերյանի, «Արտֆուդ» ընկերության գլխավոր տնօրեն եւ նախագահ Սերգեյ Կարապետյանի եւ կապի ու տրանսպորտի նախկին նախարար Էդուարդ Մադաթյանի թեկնածությունը:
Ընդ որում, վերոնշյալ երեք անձանցից «Օրինաց երկիր» կուսակցության անդամ է միայն Մադաթյանը, ով վերջերս է անդամակցել կուսակցությանը եւ Էրեբունու կառույցի ղեկավարն է: Իսկ եթե նախարար նշանակվի մյուս թեկնածուներից որեւէ մեկը, նա ստիպված է լինելու անդամակցել ՕԵԿ-ին:
Մադաթյանը այսօր հայտնել էր, որ իրեն դեռ նման առաջարկ չի արվել, սակայն նման առաջարկի դեպքում «ինքը չէր հրաժարվի»:
Հիշեցնենք, որ գյուղատնտեսության նախարարի պաշտոնը կոալիցիոն հուշագրով վերապահված է «Օրինաց երկրին»: Արթուր Բաղդասարյանն այսօր՝ դեկտեմբերի 27-ին հայտնել էր, որ նոր նախարարի անունը հայտնի կլինի ամանորից հետո միայն: