Բրիտանիայի արտաքին գործերի նախարար Բորիս Ջոնսոնը եւ ԱՄՆ պետքարտուղար Ռեքս Թիլերսոնը մտքեր են փոխանակել Իրանի միջուկային գործարքի վերաբերյալ եւ քննարկել են, թե ինչպես պետք է քաղաքական ճանապարհով վերջ տալ Սիրիայի նախագահ Բաշար Ասադի կառավարմանը, հաղորդում է «ՌԻԱ Նովոստին»:
«Սիրիայի հարցով Մեծ Բրիտանիայի արտգործնախարարը աջակցություն է հայտնել Սիրիայի ճգնաժամի վերաբերյալ ԱՄՆ պետքարտուղար Թիլերսոնի վերջին ելույթին: Պետքարտուղարը եւ արտգործնախարարը քննարկել են այն քայլերը, որոնք պետք է ձեռնարկվեն Ասադի ռեժիմի իշխանության ավարտը հասցնելու համար», - ասվում է Բրիտանիայի ԱԳՆ պաշտոնական ներկայացուցչի հայտարարությունում:
«Իրանի հարցով նրանք քննարկել են վերջին իրադարձությունները եւ մտքեր փոխանակել Իրանի միջուկային համաձայնագրի վերաբերյալ: Բրիտանիայի արտգործնախարարը շեշտել է, որ Մեծ Բրիտանիան համոզված է՝ համաձայնագիրը աշխատում է, եւ որ Մեծ Բրիտանիան սերտորեն կաշխատի ԱՄՆ-ի, եվրոպական եւ միջազգային գործընկերների հետ տարածաշրջանում Իրանի ապակառուցողական վարքին դիմակայելու համար», - ասվում է հայտարարությունում:
